Gazeta Si – “Pas Pirlos, Italia nuk ka pasur më një talent të madh. Kanë kaluar 20 vjet dhe është vrarë talenti në fidanishtet e futbollit italian. Për Italinë do të duhen 10-15 vjet që të kthehet në ‘top’, në nivelin e Anglisë”.
Janë fjalët e ish-fantazistit të Kroacisë dhe Milanit, Zvonimir Boban, aktualisht përgjegjës futbolli në UEFA. Për mikrofonët e ‘Radio anch’io sport’, ai gjithashtu ka theksuar: “Duhen përmirësuar edhe stadiumet, që tashmë janë bërë problematikë”.
Boban ka dhënë mendimin e tij edhe për kampionatin e Serisë A: “Napoli më duket ekip i pjekur, ka një atmosferë të jashtëzakonshme dhe është i vetëdijshëm për forcën e vet. Luan një futboll shumë të bukur, ka shumë ekuilibër.
Milani ka karakter të fortë, historia dhe madhështia e tij kanë shumë rëndësi. Edhe Interi mund të kthehet fuqishëm, nëse Lukaku kthehet ai i mëparshmi”.
Për përballjen e Milanit në Champions me Dinamon e Zagrebit, ish-mesfushori thotë: “Milani mund të fitojë në Zagreb, ka kualitetin në anën e vet. Dinamo është e fortë dhe do ta shesë shtrenjtë lëkurën, janë dy skuadrat e jetës sime”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
