BLLAKOT e sotëm dhe Harry Fultz

Një djalë 33 vjeç, i quajtur Alqi Bllako, si jo pak të tjerë, bëri karrierë në çdo stendë partie e parie, sot pritet të arrestohet. Shkeljet që ka bërë, sipas elitës drejtuese, apo parisë së fundit që frekuentoi, janë përgjegjësi individuale. Madje dëgjova që  “deputetët janë të popullit”, pra është faji i popullit që i ka votuar, paçka se në lista si çorbë të prishur deputetët ofrohen nga kryetarët e Partisë.

Për Bllakon personalisht nuk kam asnjë ndjesi. Por për fenomenin Bllako në shoqëri padyshim shqetësohem. Ai nuk është as i pari as i fundit ndër të rinjtë tanë. Pa punë, pa eksperiencë, edhe pse me diploma të mira në xhep, shumë prej tyre shëtisin stendë më stendë partie, si punëtoret e seksit trotuar më trotuar, edhe në fund të përdorur e të lëshuar, mbeten të vetmuar.

Ajo që po dështojmë t’ju mësojmë të rinjve tanë është ajo që Harry Fultz i mësoi Stavro Bojaxhiut një mbasdite pas praktikës bujqësore në tokat pranë Laprakës. Stavro edhe Fultz-i u nisën për në shkollë (sot shkolla pedagogjike). Teksa bisedonin, në një moment Stavro e pyet - i cilës fe jeni zotni?

Ai i ra supeve dhe ju përgjigj - Feja ime, biri im, është të mos shkel thundrat e tjetrit dhe të më vijë turp që të kem një polic që të më ruaj nga prapa.

Pas pak arritën tek “Kursali” ku mjaft nga paria e qytetit ishin ulur në tavolinat e nxjerra jashtë.  Stavro e pyet sërish - Zotni! Nuk u kam parë e as kam dëgjuar të uleni edhe ju me këta të parët tanë të qytetit! A s’keni ndonjë shok a mik prej tyre?

Ai më buzëqeshi, edhe i kthehet Stavros së ri:

- Shok e mik unë kam atë që ecën dorë për dore me mua.

Fultz-i me dy doktoratura nga Universiteti i Chikagos u mësoi studentëve të tij se “kultura pa edukatën, sidomos atë të punës, ia humbet vlerat njeriut. Dhe veçanërisht edukatën e punës njeriu duhet ta ketë brilante”.

Historia e ngjitjes së Bllakos, pa eksperiencë e pa punë apo narrativat e sotme të parisë që ai frekuentoi edhe shërbeu me ngulm e devotshmëri për të ngjitur shkallët e karrierës, nuk janë thjesht çështje personale të tij apo të tyre, por projeksione ekselente të shoqërisë që kemi ndërtuar, të cilës i kanë munguar modelet si Harry Fultz.

---

Copyright © Gazeta “Si”

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.