.png)
Teksa në Shqipëri bizneset dhe qytetarët e kanë fjetur mendjen se nuk do të ketë një paketë të tretë në përgjigje të krizës së shkaktuar nga Covid-19, por që sipas kryeministrit pasojat do të shërohen vetëm me Rindërtimin, në Kosovë biznesi po reagon për miratimin e ligjit të Rimëkëmbjes ekonomike.
Kryetari i Odës Ekonomike të Kosovës (OEK), Berat Rukiqi, thotë se vonesa e miratimit të Projektligjit për rimëkëmbje ekonomike, rrezikon që vendi të përfundojë në një kolaps ekonomik.
Sipas tij, dëmet që mund të shkaktohen nga vonesa e miratimit të këtij projektligji, siç janë mbyllja e bizneseve apo humbja e vendeve të punës, do të jenë të pariparueshme.
“Sa më shumë që po vonohet votimi i Projektligjit për rimëkëmbjen ekonomike, kriza po thellohet, dhe pastaj kur të fillohet është shumë vështirë të rikuperohet. Disa dëme janë të pariparueshme. Nëse vijmë në situatë për tu mbyllur mijëra biznese, dhe mijëra vende pune, ato nuk i rregullon asnjë ligj dhe përkrahje financiare. Ne jemi në fazë shumë delikate dhe secila ditë po bëhet më e vështirë”, tha Rukiqi.
Ai ka kritikuar deputetët e Kuvendit, që sipas tij, nuk kanë vullnet për ta miratuar projektligjin. Rukiqi thotë se mirëqenia e tyre dhe militantëve që kanë punësuar nuk është rrezikuar, por, se shumica e qytetarëve janë prekur nga kriza që ka shkaktuar pandemia.
“Ajo që unë po shoh te skena politike është dështimi për ta lexuar situatën. Shumica prej tyre nisen prej një pozicioni komod që e kanë. Përderisa ata nuk janë të ndikuar nga kriza, për këtë pjesë të skenës politike pozitë dhe opozitë, nuk ka një lloj urgjence për të vepruar. Situata është shumë ma ndryshe se është shkaktuar nga pandemia dhe janë globale.”- Rukiqi
“Ajo që unë po shoh te skena politike është dështimi për ta lexuar situatën. Shumica prej tyre nisen prej një pozicioni komod që e kanë. Përderisa ata nuk janë të ndikuar nga kriza, për këtë pjesë të skenës politike pozitë dhe opozitë, nuk ka një lloj urgjence për të vepruar. Situata është shumë ma ndryshe se është shkaktuar nga pandemia dhe janë globale. Këto raste i kemi këtu dhe mund të shumëfishohen dhe pastaj nëse nuk ndërhyhet në kohën e duhur me mekanizma të duhur ne do ta shohim një kolaps ekonomik shumë shpejt”, shton Rukiqi.
Sipas tij, në bazë të dhënave zyrtare krahasuar me vitin e kaluar këtë vit për shkak të pandemisë dëmi i përgjithshëm në ekonomi ose rënia e qarkullimit tek bizneset ka arritur vlerën 1 miliard euro.
“Ne kemi një raport zyrtar nga ATK-ja dhe nëse e krahasojmë periudhën e njëjtë të vitit të kaluar në periudhën prej kur jemi në masa kufizuese për shkak të pandemisë nga mesi i marsit dhe muaji gusht, dëmi i përgjithshëm në ekonomi ose rënia e qarkullimit tek bizneset ka arritur vlerën 1 miliard euro. Kjo reflektohet edhe në performacën ekonomike të vendit apo në bruto prodhimin vendor gjë që do të reflektojë në një tkurrje ekonomike që do të jetë jo më e vogël se 5%. Për neve është shumë sepse na pamundëson të mbajmë trendin që e kemi pasur të rritjes ekonomike”, tha ai për Ekonomia Online.
Ai shpjegon se bizneset nuk kanë mundësi ta paguajnë pagën që e kanë paguar para pandemisë.
“Rënia e qarkullimit tek bizneset ka arritur vlerën 1 miliard euro. Kjo reflektohet edhe në performacën ekonomike të vendit apo në bruto prodhimin vendor gjë që do të reflektojë në një tkurrje ekonomike që do të jetë jo më e vogël se 5%.”- Rukiqi
Sipas Rukiqit nëse nuk kalon ligji duhet të diskutohet për mekanizma të tjerë.
“Bizneset nuk kanë mundësi ta paguajnë pagën që e kanë paguar para pandemisë. Normalisht kjo do të shkaktojë pakënaqësi, por pagat nuk mund të mbesin artificialisht të larta sidomos kur kemi rënie të qarkullimit dhe shpenzimet mbesin të njëjta. Kam pritur që do të ketë përkrahje për likuiditetin e kompanive dhe do të ketë rritje të fuqisë blerëse dhe gjendja deri në fund të vitit do të përmirësohet. Tani jemi në një status kohë edhe te vendimet e qeverisë edhe tek bizneset mirëpo nëse veç shihet që nuk kalon ligji atëherë duhet të fillojmë me diskutu mekanizma tjerë. Është marrë vendim i duhur për likuiditetin e kompanive që shkon për pagat e punëtorëve dhe iu shpërndahet kompanive të cilat realisht do ta kenë më të lehtë ti paguajnë pagat e punëtorëve”, shprehet Rukiqi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
