.png)
Udhëheqësi i Koresë së Veriut Kim Jong Un planifikon të udhëtojë në Rusi këtë muaj për të takuar Presidentin Vladimir Putin.
Të dy liderët do të diskutojnë mundësinë që Koreja e Veriut t’i sigurojë Moskës armë për të mbështetur luftën e saj në Ukrainë.
Vendndodhja e saktë e takimit të planifikuar nuk është e qartë.
Burimet i thanë New York Times se Kim kishte shumë gjasa të udhëtonte me tren të blinduar.
Takimi i mundshëm vjen pasi Shtëpia e Bardhë tha se kishte informacione të reja se negociatat për armët midis dy vendeve po “përparonin në mënyrë aktive”.
Zëdhënësi i Këshillit të Sigurisë Kombëtare, John Kirby, tha se ministri rus i Mbrojtjes, Sergei Shoigu, ishte përpjekur të “bindte Phenianin t’i shesë municion artilerie” Rusisë gjatë një vizite të fundit në Korenë e Veriut .
Armët e ekspozuara në takim përfshinin raketën balistike ndërkontinentale Hwasong. Ishte hera e parë që Kim hapi dyert e vendit për mysafirët e huaj që nga pandemia Covid.
Putin dhe Kim që atëherë kanë shkëmbyer letra “duke u zotuar të rrisin bashkëpunimin e tyre dypalësh”, tha ai.
Kirby paralajmëroi se SHBA-të do të ndërmarrin veprime, duke përfshirë vendosjen e sanksioneve, nëse Koreja e Veriut do të furnizonte Rusinë me armë.
Ekziston shqetësim si në Uashington ashtu edhe në Seul për atë që do të merrte Koreja e Veriut në këmbim të një marrëveshjeje të tillë, e cila mund të rezultojë në rritjen e bashkëpunimit ushtarak midis dy vendeve në Azi.
Të hënën, shërbimi i inteligjencës i Koresë së Jugut informoi se zoti Shoigu i kishte sugjeruar Rusisë, Kinës dhe Koresë së Veriut të zhvillonin stërvitje të përbashkëta detare, të ngjashme me ato të kryera nga SHBA, Koreja e Jugut dhe Japonia.
Një frikë tjetër është se Rusia mund të furnizojë Korenë e Veriut me armë në të ardhmen, në një kohë kur Pheniani ka më shumë nevojë për to.
Akoma më shqetësuese, Kim Jong Un mund t’i kërkojë Putinit t’i sigurojë atij teknologji ose njohuri të avancuara të armëve, për ta ndihmuar atë të bëjë përparime në programin e tij të armëve bërthamore.
Megjithatë, një marrëveshje mund të përfundojë më shumë transaksionale sesa strategjike. Tani për tani, Rusia ka nevojë për armë, dhe Koreja e Veriut e uritur nga sanksionet ka nevojë për para dhe ushqim.
New York Times raportoi se takimi mes Kim dhe Putin mund të zhvillohet në qytetin port të Vladivostok, në bregun lindor të Rusisë.
Burimi: BBC/Përshtati Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
