Nga Gazeta ‘SI’ – Investimet e huaja direkte prekën vlerën e 411 mln eurove në fund të tremujorit të tretë 2024. Vlera është e barabartë me atë të një viti më parë.
Sipas Bankës së Shqipërisë, për periudhën janar-shtator, në vend kanë hyrë 1.16 mld euro si investime të jashtme.
Shifrat për sezonin e verës tregojnë se ka një reduktim të investimeve në pasuritë e paluajtshme, 88 mln euro nga 97 mln në tremujorin paraardhës. Në total, 169 mln euro janë investuar në këtë sektor për 9 muajt e parë të vitit.
Ndërkohë vërehet një rritje e IHD-ve në sektorin financiar, 80 mln nga 52 mln në tremujorin paraardhës. Gjithsesi, kjo mund të lidhet dhe me rikapitalizimin e bankave ndërkombëtare në filialet e tyre në Shqipëri.
Origjina e këtyre investimeve në masën më të madhe është e panjohur. Sipas BSH-së, 90 mln euro, që është vlera më e madhe e IHD-ve, mbetet anonime, për “arsye konfidencialiteti”. Ky grup ka patur rritje të dukshme që prej të paktën një viti.
Vërehet një reduktim i investimeve nga Turqia nga tremujori paraardhës (77 mln euro), por mbetet i njëjtë me vlerën e një viti më parë, 58 mln euro.
Investimet e huaja kanë qeë së fundmi temë debati midis qeverisë, opozitës dhe institucioneve të tjera. Teksa deputeti socialist dhe drejtuesi i komisionit të Dezinformimit Erion Braçe i kërkoi Bankës së Shqipërisë të analizojë investitorët e huaj në Shqipëri, demokratët propozuan ndryshime në ligj.
Deputetja Jorida Tabaku ka dërguar në Kuvend një projektligj që parashikon krijimin e një kornize ligjore për të shqyrtuar investimet e huaja direkte që mund të përbëjnë rrezik për sigurinë kombëtare, si p.sh aksesi në informacione sensitive, teknologjinë kritike, struktura energjetike, transport etj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
