Nga Gazeta 'SI' - Treguesi i ndjesisë ekonomike është rritur me 0.6 pikë gjatë shtatorit, ndikuar nga rritja e besimit në industri, shërbime dhe ndërtim.
Për konsumatorët treguesi nuk pati ndryshime, ndërsa për sektorin e tregtisë shënoi një rënie të lehtë.
Matjet e Bankës së Shqipërisë thonë se treguesi i besimit në tregti ra me 2.3 pikë përqindje në muajin shtator, pasi këto biznese presin rënie të nivelit të punësimit. Ecuria e biznesit dhe pritjet për çmimet janë po ashtu në rënie.
Treguesi i besimit të konsumatorëve qëndroi në të njëjtin nivel të një muaji më parë, ndërsa presin një rritje të papunësisë, por rënie të çmimeve.
Bizneset e shërbimit kanë pasur rritjen më të fortë të besimit gjatë shtatorit, me 3.1 pikë përqindje, ndikuar nga vlerësimet optimiste për aktivitetin e biznesit dhe kërkesës. Gjithashtu, pritjet për nivelin e punësimit në të ardhmen janë rishikuar për lart. Bizneset kanë rishikuar për poshtë ecurinë e çmimeve në të ardhmen.
Industria ka pasur një rritje me 2.5 pikë përqindje të treguesit të besimit, ndikuar nga kërkesa e bizneseve dhe ecurinë e eksporteve. Industria pret rritje të çmimeve.
Treguesi i besimit në ndërtim u rrit me 1.2 pikë përqindje në shtator, drejtuar kryesisht nga vlerësimet më optimiste për aktivitetin aktual ndërtues. Pritjet për punësimin u rritën lehtë, ndërsa pritjet për çmimet regjistruan rënie këtë muaj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
