.png)
Nga Gazeta ‘SI’ – Banka Europiane për Rindërtim dhe Zhvillim, BERZH, ka ulur parashikimin e saj për ekonominë shqiptare.
Sipas raportit të fundit, ekonomia e Shqipërisë do të rritet me 3.5% për 2025-n dhe 2026-n, me ulje 0.2% nga parashikimi i bërë në fillim të këtij viti.
BERZH thekson se Shqipëria mund të rrezikohet nga një rënie e kërkesës nga vendet e euros, një reduktim të dërgesave të emigrantëve dhe në rast se turizmi, që ka kapur shifra rekord në dy vitet e fundit, nis të ngadalësohet.
Moti i thatë mund të ndikojë negativisht në prodhimin e energjisë dhe të çojë në importe më të larta të energjisë elektrike, megjithëse këto rreziqe zbuten duke rritur prodhimin nga burimet alternative të rinovueshme.
Rritja ekonomike e Shqipërisë gjatë vitit 2024 ishte 4%, mbështetur nga sektori i shërbimeve, kryesisht turizmi dhe ndërtimit, ndërsa prodhimi industrial dhe bujqësor mbetet në rënie. Në anën e shpenzimeve, konsumi privat dhe investimet publike ishin drejtuesite kryesorë të rritjes ndërkohë që eksportet ishin në rënie duke rritur deficitin.
Inflacioni ra mesatarisht në 2.2% në vitin 2024 nga 4.8% në 2023, duke i lejuar Bankës së Shqipërisë të ulë normën bazë nga 3.25% në fillim të 2024 në 2.75%. Sektori financiar ka mbetur i qëndrueshëm, me rritje të aktivitetit kreditues. Rreziqet pozitive vijnë nga vazhdimi i pritshëm i reformave strukturore, një angazhim i fortë për pranimin në BE dhe aksesi i mundshëm në financim nga BE.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
