Kryeministrja e Serbisë, Ana Bërnabiç ka thënë se këtë javë do të mbahet një takim me përfaqësuesit e serbëve të Kosovës për të diskutuar rreth situatës në veri.
Bërnabiç po pretendon se tensionet po rriten sërish në Kosovë, ndërkohë ka kritikuar komunitetin ndërkombëtar.
“Ajo që është e tmerrshme dhe ajo që na frikëson e shqetëson është se tensioni po rritet sërish. Numri i provokimeve është në rritje. Komuniteti ndërkombëtar është ende i heshtur”, ka deklaruar Bërnabiç.
Ditëve të fundit, në veri të Kosovës është raportuar për djegien e disa makinave të pronarëve serbë, të cilat kanë qenë të regjistruara me targa RKS – Republika e Kosovës.
Më pas, Policia e Kosovës njoftoi se kishte arrestuar një pjesëtar të komunitetit serb në Mitrovicën e Veriut nën dyshimin se, ndër të tjera, ka marrë pjesë në djegien e një makine.
Bërnabiç deklaroi se Asociacioni i Komunave me Shumicë Serbe ka 10 vite që po pret të krijohet dhe se institucionet kosovare po e shmangin me çdo kusht.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
