Situata në seancën plenare të Kuvendit këtë të enjte, ku pika e parë e rendit të ditës ishte rezoluta e propozuar nga socialistët kundër raportit të Dick Marty-t u ashpërsua kur në sallë hyri Sali Berisha.
Ish-Kryeministri replikoi nga vendi me Edi Ramën, teksa ky i fundit i përsëriste akuzat se kishte furnizuar tanket e Millosheviçit me naftë dhe i kujtonte se ishte shpallur “non grata” nga SHBA.
“Ju e furnizuat Milloshviçin. Je i padëshirueshëm, ‘non grata’. Ik tani, mbaroi historia jote. Dil nga ana tjetër dhe bëje çorapin-çorap. Të vjen historia përpara dhe thotë prit se ‘ti mendon se je për i fortë, por historia është më e fortë se kurrë’. Ja ku të vjen historia edhe me raportin e Dick Marty-t. Si nisi kjo punë? Nga Kremlini! Si vazhdoi? Ju na e paskeni votuar. I padëshirueshëm për kë? Për Sllobodanin? Jo për SHBA-të. Partia Demokratike që tani është një tufë varkash druri që vini këtu dhe ju gënjen mendja se përballeni me një anije. Një tufë varkash me lopata jeni. Oqeanin e harruan disa, do harroni edhe Gjibraltarin dhe shumë shpejt do harroni dhe Adriatikun. Të mbyllet kontinenti”, deklaroi Rama.
“Kur ky shiste ikona të vjedhura në Paris, Kosova mbulohej me gjak”, iu kundërpërgjigj Berisha.
Pas minutash të tëra replikash e kundërreplikash nga foltorja dhe nga vendi, Berisha lë karrigen e tij dhe i drejtohet foltores, pavarësisht se Lindita Nikolla ja kishte dhënë fjalën Tomor Alizotit.
Përveç kësaj, Berisha nuk ndalet në foltore, por i afrohet Edi Ramës me fjalët “burracak, i pafytyrë, i pavlerë”, që sipas tij e kishte trembur protesta e 7 korrikut. Mes tyre ndërhyjnë dy punonjës të Gardës.
Ndërkohë, Tomor Alizoti nga vendi e cilësoi të gjithën një teatër dhe u tërhoq nga fjala duke ja lënë kohën e vet Sali Berishës. Pas hapjes së mikrofonëve, Berisha dha edhe variantin e tij se përse u arrestua Hashim Thaçi.
“U arrestua nga trinomi Moskë-Beograd-Tiranë, sepse zotëria parafolës (Edi Rama) e futi në një spirale me ndryshime kufijsh të Kosovës. Ky këtu!”, tha Berisha.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
