Besimtarët bektashinj festojnë këtë të martë festën e Sulltan Novruzit, dita më e rëndësishme fetare e tyre. Kjo ditë përkujton ditëlindjen e Imam Aliut, që për bektashnjtë lidhet me ringjalljen e jetës dhe me shpresën për ditë më të mira.
Festimet, mesazhet dhe urimet e kësaj dite të shënuar për komunitetin bektashi, sot kremtohen në selinë e kryegjyshatës botërore bektashiane në Tiranë, të drejtuara nga kryegjyshi Baba Dede Edmond Brahimaj.
Novruz në gjuhën perse do të thotë ‘ditë e re’ dhe është festuar për më shumë se 3000 vite. Tradicionalisht ajo nis sapo ndodh ekuinoksi pranveror. Në kalendarin iranian ajo është dita e parë e vitit të ri dhe përkon gjithashtu me ikjen e dimrit dhe ardhjen e pranverës.
Novruzi festohet në Lindjen e Mesme, Azinë Qendrore, Indi, Gjeorgji dhe Shqipëri. Por, kryeqendra e festimeve mbetet Irani.
Zakonisht, kjo festë zgjat tre ditë. Besimtarët bektashinj shkëmbejnë vizita tek njëri-tjeri dhe më pas kryejnë ritet fetare. Përsa i përket tryezës, nuk duhet kurrsesi të mungojë uji, veza, qirinjtë dhe frutat e perimet e stinës. Në këëtë ditë, besimtarët nxiten që të ndihmojnë ata që në nevojë dhe sipas traditës shpërndajnë qumësht dhe sherbet, që simbolizojnë pastrimin e trupit dhe shpirtit.
Në ditët e festës bektashinjtë mbjellin lule në shtëpitë e tyre, ose vendosin në hyrje të portave degë ulliri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
