Gazeta Si – Kur është në mes Mario Baloteli, asgjë nuk është çudi. Futbollisti italian që aktualisht luan për Adana Demirsporin në kampionatin turk, mund të transferohet në Amerikën e Jugut, konkretisht në Argjentinë.
Gjatë një lidhjeje direkt bashkë me Serxhio Agueron, pas ndeshjes Mançester Siti-Real Madrid në Ligën e Kampionëve, Baloteli ka pohuar se do ta pranonte menjëherë një ofertë të Boka Zhuniors.
“Boka më pëlqen si skuadër, do të më pëlqente të luaja për të. Të gjithë fëmijët janë rritur me mitin e Maradonës dhe Rikuelmes. E njoh Bokën falë tyre dhe kam thënë gjithmonë se herët a vonë do të luaj aty. Nëse Roman (Rikuelme është aktualisht drejtues në klubin argjentinas) më thërret, do të shkoja pa u menduar dy herë”, – është shprehur Baloteli.
Karriera e sulmuesit italian ka pasur një trajektore të çuditshme. Ai është aktivizuar me klube të mëdha, si Interi, Milani, Mançester Siti dhe Liverpuli, ndërsa tani e gjen veten në Turqi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
