.png)
Nga Gazeta Si- Vendet e BE-së do të kenë vështirësi të përballojnë temperatura në rritje të shpejtë të kontinentit dhe rritjen e katastrofave natyrore që vijnë si pasojë e tyre, duke përfshirë zjarret dhe përmbytjet, për shkak të mungesës së planeve të përshtatjes ndaj klimës në të gjithë bllokun, kanë paralajmëruar këshilltarët e BE-së.
Ndryshimet klimatike po e godasin Europën fort dhe shpejt, kjo dekadë deri më tani ka parë dëme prej rreth 45 miliardë eurosh në vit, një rritje pesëfish që nga vitet 1980. Ndërsa bota është tashmë 1.4 °C më e ngrohtë se mesatarja para-industriale, Europa është rreth 2.5 °C më e nxehtë.
“Brukseli duhet ta marrë seriozisht përshtatjen ndaj një klime në rritje- që dikur konsiderohej e barabartë me ‘heqjen dorë’ nga lufta për të ulur emetimet. Përpjekjet e përshtatjes në të gjithë Europën mbeten të pamjaftueshme”, thotë Ottmar Edenhofer, i cili kryeson Bordin Këshillimor Shkencor Europian për Ndryshimet Klimatike (ESABCC).
“Ato janë të fragmentuara dhe shpesh vijnë shumë vonë”, u tha ai gazetarëve, duke treguar përmbytjet e fundit në rajonin e Valencias të Spanjës, Belgjikë dhe Irlandë si shembuj se si sistemet e dobëta të paralajmërimit të hershëm dhe përgjegjësitë e paqarta mund ta përkeqësojnë dëmin.
Në vitin 2024, përmbytjet në Valencia vranë 229 njerëz në Gadishullin Iberik. Zjarret dogjën një milion hektarë në të gjithë Europën në vitin 2025, duke djegur deri në 3% të Portugalisë. Stuhitë e breshrit shkaktojnë dëme miliarda dollarëshe në të gjithë bllokun çdo vit.
“Këto rezultate tregojnë pengesa të vazhdueshme për përshtatje efektive”, tha ekonomisti gjerman. Pengesat e identifikuara nga shkencëtarët e klimës në raportin e tyre të fundit përfshijnë mungesën e informacionit, kapacitetit dhe koordinimit institucional – “ndërsa rreziqet klimatike intensifikohen, këto pengesa dëmtojnë gjithnjë e më shumë aftësinë e Evropës për të menaxhuar ndikimet në mënyrë efektive”, tha Edenhofer.
Thënë thjesht, “politikat aktuale nuk janë të përgatitura për skenarin prej katër gradësh”, shtoi ai.
Raporti paralajmëron se edhe një skenar më optimist i bazuar në politikat aktuale klimatike, pa marrë parasysh një reagim të ashpër kundër politikave të gjelbra, do ta shihte Europën të ngrohej me 3.9 °C deri në vitin 2100.
Përgatitja e Europës
Organizata këshillimore thotë se blloku duhet të “mandatojë dhe harmonizojë vlerësimet e rreziqeve klimatike”, duke përfshirë një skenar të përbashkët referimi në të gjithë Europën.
Ky skenar duhet të bazohet në pritjen se ngrohja globale mund të arrijë deri në 3.3 °C. Në BE, ngrohja mund të jetë edhe më e lartë, pasi blloku tashmë po përjeton rreth 1 °C më shumë ngrohje sesa mesatarja globale”, shton bordi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje