.png)
Bashkimi Europian u kërkon vendeve kandidate për anëtarësim që të përshtasin plotësisht legjislacionet e tyre me standardet dhe rregullat e Brukselit për emigracionin dhe azilantët. Thirrja është bërë pas video-konferencës informale të ministrave të Jashtëm dhe atyre të Brendshëm të unionit.
Takimi u organizua nga Presidenca portugeze dhe Përfaqësuesi i Lartë i BE-së për Politikën e Jashtme, Josep Borrell.
“BE duhet të sigurohet dhe të garantojë që emigracioni, në të gjitha aspektet e tij të shndërrohet në një element të rëndësishëm në marrëdhëniet e unionit me vendet e treta. Një emigrim i sigurtë dhe i mirëmenaxhuar mund të shndërrohet në një mekanizëm plotësues në shërbim të politikës së jashtme të BE-së dhe përfitues për partnerët tanë”, deklaroi Borrell në fund të këtij takimi.
Presidenca portugeze kërkoi më shumë bashkëpunim me vendet e treta, sidomos me vende që shpresojnë që një ditë të jenë anëtare me të drejta të plota në BE.
“Çdo politikë e BE në lidhje me emigracionin, që të ketë sukses duhet të hartohet e zbatohet në bashkëpunim të ngushtë me vendet e treta partnere dhe mesazhi ynë sot është i qartë; veproni tani. Është koha për rezultate. Do të punojmë së bashku për të ndërtuar një bashkëpunim mbi emigrimin, që të jetë i mirëfarkëtuar dhe ku merren për bazë edhe përparësitë e partnerëve tanë”, deklaroi ministri i Brendshëm portugez, Eduardo Cabrita.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
