Këshilli i Bashkimit Europian ka konfirmuar heqjen e Kosovës nga lista e vendeve të sigurta, ndaj të cilave nuk ka pasur kufizime për udhëtime në UNION. Në një njoftim, Këshillit të BE-së thekson po ashtu se kufijtë do të mbyllen edhe me Maqedoninë e Veriut, Malin e Zi, Shtetet e Bashkuara, Libanin dhe Izraelin.
Sipas njoftimit të BE-së udhëtimet që nuk janë të domosdoshme do të jenë të ndaluara. Megjithatë, ky vendim nuk i ndalon shtetet anetare që të heqin kufizimet për personat plotësisht të vaksinuar nga këto shtete, thuhet në njoftimin e Bashkimit Evropian.
Rritja alarmante e numrit të të infektuarve dhe numrit të vdekjeve ka bërë që Bashkimi Europian të ndryshojë listën e vendeve të sigurta.
Cilat do të jenë kufizimet, kjo do të varet edhe nga vendet anëtare të BE-së pasi disa prej tyre edhe më herët, pa e pritur vendimin e Këshillit, kishin vendosur kufizime duke kërkuar testet negative nga ana e udhëtarëve.
Sipas burimeve brenda BE-së, nga vendet të cilat nuk janë në listën e “shteteve të sigurta”, nuk lejohet fare hyrja në BE. Përjashtim përbëjnë udhëtimet e punës dhe ata që kanë leje qendrim në BE.
Por, edhe ata mund të detyrohen të vendosen në vetizolim për një periudhë të caktuar kohore.
Kosova ishte vendosur në listën e vendeve të sigurta në fund të muajit qershor, pikërisht në prag të pushimeve verore. Në atë kohë, numri i të infektuarve ishte shumë i ulët.
Por të hënën në Kosovë janë regjistruar edhe 20 viktima dhe 932 raste të reja të të infektuarve me koronavirus.
Nga numri i përgjithshëm i të testuarve, mbi 12 për qind kanë dalë pozitivë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
