Pak orë pas përleshjeve të mbrëmjes së të shtunës, mbështetësit e opozitës u rikthyen para drejtorisë së Policisë së Tiranës, këtë herë jo për t’u përballur fizikisht me forcat e rendit, por për t’u solidarizuar me të arrestuarit dhe për të kërkuar lirimin e tyre.
Opozita akuzon drejtpërdrejtë Kryeministrin Edi Rama se me urdhër të tij Policia e Shtetit ka arrestuar persona që jo vetëm nuk kanë patur lidhje me dhunën, por as me vetë protestën.
Lulzim Basha vetë e nisi ditën me një vizitë në Spitalin e Traumës, aty ku po merr kurim sekretari organizativ i demokratëve, Sait Dollapi pas plagëve që mori mbrëmjen e së shtunës gjatë arrestimit nga ana e Forcave të Ndërhyrjes së Shpejtë. Këta të fundit e goditën zyrtarin e PD-së gjëtë përpjekjes së Dollapit për t’i shpëtuar arrestimit.
Megjithë plagët e marra, Sait Dollapi u shoqërua me forcë në drejtim të policisë dhe pas mesnatës në drejtim të Spitalit të Traumës për të marrë mjekim. Këtu në orët e paradites së të dielës u la i lirë.
Pas vizitës tek Dollapi, Basha iu bashkua protestuesve të opozitës të grumbulluar ndërkohë para Drejtorisë së Policisë së Tiranës. Në fjalën e mbajtur para tyre, kreu i PD-së përsëriti akuzën se sot nuk qeveris vota e shqiptarëve, por krimi dhe oligarkia. “Nga Parlamenti i krimit ka dalë një Qeveri e krimit me njeriun me arrogant e mashtrues që u ka vënë shqelmin në fyt shqiptarëve të thjeshtë dhe ka ulur në tavolinën e babazësë kriminelët dhe oligarkët”, tha ai.
Sa i takon dhunës që shoqëroi protestën e së shtunës, Basha drejtoi gishtin e fajtorit nga Kryeministria. Ai foli për një skenar të organizuar nga vetë Edi Rama. “Skenari i dhunës i shërbeu Ramës për të provuar para shqiptarëve dhe mbarë botës se është i vetmi njeri që i intereson dhuna”, shtoi Basha.
Kur flet për afatet e largimit të Kryeministrit, Lulzim Basha nuk flet më me ditë, por me orë dhe ftoi qytetarët në protestën e thirrur për ditën e hënë, ku paralajmëroi se populli do t’i kthehet dhunës së qeverisë, sipas tij, në proporcion të drejtë.
“Junta kriminale i ka orët e numëruara. Nesër do të marrë përgjijen e plotë nga shqiptarët e bashkuar. Dhuna ndaj Sait Dollapit është një mesazh për të trembur shqiptarët e bashkuar. Por, ka për të marrë një përgjigje proporcionale nga populli i bashkuar dhe i vendosur për ta çuar betejën deri në fund”, u shpreh Basha.
Për të arrestuarit, Basha tha se opozita nuk do të lejojë asnjë prej tyre që të mbahet i arrestuar, duke shtuar se tanimë nuk ka një rrugë të mesme për të zgjedhur.
“Kurrë nuk ka qenë më e qartë dhe e kthjellët zgjedhja! O me juntën, o me popullin e bashkuar për liri dhe demokraci”, shtoi ai.
Gjatë protestës para Drejtorisë së Policisë së Tiranës, Basha shoqërohej edhe nga drejtues të partive të tjera opozitare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
