.png)
Edhe pse se ka kundër pothuajse të gjithë grupin e tij parlamentar, kryetari i Partisë Demokratike, Lulzim Basha, ka refuzuar të japë dorëheqjen.
“Përgjegjësia bie te të gjithë, por fillon me mua”.
Kështu ka deklaruar Basha në mbledhjen me dyer të mbyllura me kryetarët e degëve të Partisë Demokratike dhe kandidatët në zgjedhjet e pjesshme vendore, pas humbjes së thellë.
Ai u bëri apel demokratëve që të qëndrojnë dhe të tejkalojnë kultin e individit, për një parti më të fortë.
“Secili duhet të mbajë përgjegjësi. Ne kemi në dorë të qëndrojmë, të bëjmë betejë, të bëjmë ndryshime, të tejkalojmë kultin e individit, për një parti më të fortë”, është shprehur ndër të tjera Basha në mbledhje.
Ndryshe nga mbledhja e mbrëmshme ku shumica e deputetëve i kanë kërkuar Bashës të japë dorëheqjen dhe të hapë mundësinë për zgjedhje në parti, në mbledhjen e sotme Basha ka pasur një diskutim më të qetë.
Ka pasur kryetarë degësh që kanë kërkuar që Basha nuk duhet të largohet, pasi sipas tyre në zgjedhjet e 6 marsit pati shitblerje votash.
Por në këtë mbledhje nuk i janë përgjigjur të gjithë krerët e degëve thirrjes së Bashës për të marrë pjesë, si duket në shenjë revolte për rezultatin e dobët në 6 mars. Mësohet se nga 72 kryetarë degësh, kanë marrë pjesë 43 gjithsej.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
