Komplimente që të çmendin, mbi të gjitha pasi vijnë nga një legjendë si Ksavi. Trajneri i Barcelonës, pas suksesit në kampionat ndaj Valencias, ka folur me superlativa për Pedrin, autor i një ndeshjeje të madhe dhe një goli që duhet ta ndajë me Aubamejang, i cili devijoi gjuajtjen e tij.
Në konferencë shtypi, pas fitores 1-4 në “Mestalla”, ish-mesfushori katalanas ka ngritur në qiell 19-vjeçarin: “Pedri? Është një lojtar fantastik për atë që bën në fushë, për mënyrën si vepron dhe kohët e lojës. Nuk ka dyshime që është një lojtar klasi, mendoj se është më i miri në rolin e tij aktualisht.
Dhe është vetëm 19 vjeç. Shënon edhe gola, hyn në zonë, punon shumë për skuadrën dhe rikuperon shumë topa. Është një mrekulli ta kesh në skuadër”, – ka thënë Ksavi. Kujtojmë që Pedri është vlerësuar në fund të vitit 2021 edhe çmimin “Golden Boy”, një trofe që jepet për talentet më të mëdha në botë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
