.png)
Investitorët janë vënë në dijeni se bankat qendrore në të dyja anët e Atlantikut do të vazhdojnë me rritjet e normave të interesit për të qetësuar ekonomitë e tyre dhe për të zbutur inflacionin e lartë.
Presidentja e Bankës Qendrore Europiane, Christine Lagarde, paralajmëroi se priten rritje të mëtejshme të normave të interesit, deklaratë kjo e cila u pasua më vonë nga komentet e një zyrtari të lartë të Rezervës Federale në SHBA(FED).
“Ne do të qëndrojmë në këtë linjë deri kur inflacioni të rikthehet në shifrën 2 për qind në një periudhë të arsyeshme,” tha presidentja e BQE-së në një panel diskutimi gjatë Forumit Ekonomik Botëror.
Lael Brainard, nënkryetarja e Fed, sinjalizoi se banka qendrore e SHBA-së gjithashtu kishte akoma shumë punë për të bërë për ta sjellë inflacionin pranë objektivit të saj prej 2 për qind, pavarësisht nga shenjat që shpenzimet e konsumatorëve kanë filluar të bien, tregu i punës po qetësohet dhe presionet e çmimeve janë zbutur.
“Inflacioni është ende i lartë dhe do të duhet kohë e vendosmëri për ta ulur atë në shifrën 2 për qind. Ne jemi të vendosur për të vazhduar me këtë linjë”, tha Brainard në një event të organizuar nga Shkolla e Biznesit në Universitetin e Çikagos.
John Williams, president i Fed-it të Nju Jorkut, tha se banka qendrore “duhet të vazhdojë të marrë masa” duke qenë se “do të duhet kohë që oferta dhe kërkesa të rikthehen në harmoni dhe në ekuilibrin e duhur”. Ai nënvizoi më tej nevojën që Fed të vazhdojë me ndjekjen e linjës së saj për norma të larta.
Williams shtoi: “Me inflacionin që ende vazhdon të jetë i lartë dhe me të gjithë indikatorët që tregojnë një çekuilibrim të vazhdueshëm mes ofertës dhe kërkesës, është e qartë se politika monetare ka ende shumë punë për të bërë për të ulur inflacionin në objektivin prej 2 për qind.”
Fed dhe BQE i kanë rritur me shpejtësi normat e interesit që nga viti i kaluar për të frenuar rritjen e inflacionit, të cilin fillimisht e konsideruan “kalimtar”.
Dy bankat qendrore po vlerësojnë përmasat në të cilat do të duhet të reduktojnë më tej aktivitetin ekonomik, llogari që janë tepër të ndërlikuara duke marrë parasysh efektet e vonuara që vijnë nga shtrëngimi i ekonomisë.
Lagarde tha se tregjet financiare duhet të “rishikojnë pozicionin e tyre” lidhur me vlerësimet se BQE-ja së shpejti do të ngadalësojë rritjen e normave të interesit, në përgjigje të shenjave se inflacioni në eurozonë e ka kaluar pikun e tij.
Burimi: Financial Times/Përshtati: Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
