.png)
Nga Gazeta ‘SI’ – Edhe pse Banka e Shqipërisë ka kërkuar moderim të kredisë për banesa, bankat tregtare në vend kanë miratuar më shumë të tilla.
Sipas anketës, për tremujorin e fundit të vitit, bankat refuzuan më pak kredi, duke vlerësuar të ardhurat e individëve dhe historikun e kreditit të tyre.
Vetëm një bankë ka shtrënguar kushtet e kreditimit gjatë periudhës, ndërsa të tjerat i lehtësuan.
Faktorët që ndikuan në shtrëngimin e kushteve e termave të kreditimit ishin toleranca më e ulët ndaj rrezikut, kostot dhe kufizimet më të larta nga bilanci, si edhe perceptimi i rrezikut. Konkurrenca e shtuar në sistemin bankar pati ndikim lehtësues tek kushtet e termat e kreditimit për individët.
Bankat tregtare presin që edhe për fillimin e 2025-s, kërkesa për kredi të jetë e lartë, si për financimin e konsumit, ashtu edhe për blerjen e banesave.
Për bizneset, bankat kanë shfaqur tolerancë më të ulët rreziku, por vazhduan financimin e tyre. Kërkesa për kredi e bizneseve u raportua në rritje edhe në tremujorin e fundit të vitit 2024. Kërkesë e lartë për kredi u raportua si në terma të madhësisë së biznesit, ashtu edhe në terma të qëllimit të përdorimit të kredisë.
Shkalla e miratimit të kredive për bizneset u raportua më e lartë në tremujorin e katërt, ndikuar nga politikat e bankave lidhur me kolateralin, pasqyrat financiare të bizneseve, perceptimi më i ulët i rrezikut nga ana e bankave mbi të ardhmen e sektorit ku operojnë bizneset, si edhe elementet e lidhura me historikun e kreditit të bizneseve.
Kërkesa për kredi e bizneseve pritet të rritet edhe në tremujorin e parë të vitit 2025, si në segmentin e biznesit të vogël e të mesëm, ashtu edhe në atë të biznesit të madh, si edhe në financimin e investimeve. Në mbulimin e nevojave për likuiditet kërkesa pritet të jetë disi më e ulët.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
