Bankat e nivelit të dytë lehtësuan kriteret e kredisë për individë në tremujorin e fundit të 2020-ës, por këta të fundit nuk mundën të marrin hua duke e ulur kërkesën për kredi në këtë kategori huamarrësish.
Të dhënat e raportit të Aktivitetit Kreditues të Bankës së Shqipërisë për tremujorin e fundit të 2020-ës, tregojnë se standartet u lehtësuan si për kreditë konsumatore, ashtu edhe për ato për blerjen e banesave.
” Në tremujorin e parë të vitit 2021, bankat presin t’i lehtësojnë më tej standardet e kreditimit, veçanërisht në kreditë konsumatore.”
Raporti argumenton se standardet e kreditimit për individët u lehtësuan kryesisht për arsye se bankat perceptuan më pak rrezik në lidhje me: aftësinë paguese të kredimarrësit; rrezik më të ulët nga kolaterali; si edhe zhvillimet aktuale e të pritura në tregun e banesave. Po ashtu, bankat treguan më shumë tolerante ndaj rrezikut për kreditë dhënë individëve këtë tremujor (tremujori i fundit 2020). I vetmi faktor me ndikim negativ tek standardet e kreditimit për individët u raportua situata makroekonomike në vend e perspektiva për të
Lehtësimi i përgjithshëm i kushteve të kreditimit, sipas raportit, u arrit falë lehtësimit të kushteve që kanë të bëjnë me zgjatjen e periudhës së shlyerjes së kredisë.
Nga ana tjetër, kushtet në lidhje me interesat u shtrënguan, si pasojë e marzheve më të larta aplikuar si mbi kreditë normale, ashtu edhe ato me rrezik. Në të njëjtën kohë, shtrëngimi u bë edhe në termat e reduktimit të madhësisë së kredisë, si edhe kërkesat më të larta për kolateral.
Kërkesa për kredi
Kërkesa e individëve për kredi u perceptua me rënie edhe në tremujorin e fundit të vitit,që erdhi kryesisht prej kredisë konsumatore. Në tremujorin e parë të vitit 2021, bankat presin kërkesë disi të shtuar për kredi nga ana e individëve, më e përqendruar në segmentin e kredisë konsumatore.
Sipas gjykimit të bankave, rënia e kërkesës për kredi nga individët u shkaktua nga nevojat më të ulëta në financimin e konsumit, si edhe nga rënia e të ardhurave dhe pasiguria financiare për të ardhmen, të shkaktuara nga zgjatja e periudhës së pandemisë. Faktorët e tjerë që ndikojnë kërkesën për kredi të individëve u raportuan thuajse të pandryshuar në këtë tremujor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
