.png)
Nga Gazeta ‘SI’ – Banka e Shqipërisë ka vendosur të “aktivizojë” norma e shtesës kundërciklike të kapitalit (KUNC) për të ngadalësuar kreditimin.
BSH ka përcaktuar se çdo bankë tregtare duhet të rrisë kapitalin e saj me 0.25% nga qershori i vitit të ardhshëm.
Sipas definicionit të vetë Bankës, KUNC aktivizohet gjatë periudhave të rritjes së rrezikut sistemik, në këtë rast kreditimi i lartë, matur në raport me PBB-në .
BSH thotë se ky tregues është negativ, por madhësia e vlerës negative është zvogëluar. Hendeku i raportit të kredisë ndaj Prodhimit të Brendshëm Bruto (PBB) ishte -7.2 pikë përqindje, nga -7.84 pikë përqindje që kishte qenë në tremujorin e mëparshëm.
Banka thotë se mund të ndodhë dhe një rritje tjetër e KUNC.
Prej një viti kredia bankare ka pasur një zgjerim të shpejtë, kryesisht drejt sektorit imobiliar dhe biznesit, por siç thekson BSH, një ecuri e tillë shoqërohet me rreziqe, që mund të lidhen me rënie të standardeve të kreditimit, rritjen e niveleve të përqendrimit të saj në sektorë apo tregje të caktuar, rritjen e niveleve të borxhit për agjentët e ekonomisë reale përtej niveleve të shëndetshme etj.
Në fund të 2023-shit, kredia për banesa arriti në total 48.5 mld lekë me rritje 5.2% nga 2022-shi. Lidhur me rritjen e shpejtë të kësaj dege kreditimi, BSH përgatiti dhe një rregullore për kufizimin e huasë për pasuri të patundshme, në masë dhe në vlerë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
