Ngrënia e ushqimeve të tilla si bananet, avokadot dhe salmoni mund të ndihmojë në reduktimin e efekteve negative të kripës në dietën e grave, tregon një hulumtim i fundit.
Studimi zbuloi se dietat e pasura me kalium ishin të lidhura me presionin e ulët të gjakut, veçanërisht te gratë me konsum të lartë të kripës.
Studiuesit thonë se gjetjet e tyre tregojnë se minerali ndihmon në ruajtjen e shëndetit të zemrës dhe se gratë përfitojnë më shumë se burrat.
Autori i studimit, Liffert Vogt nga Qendrat Mjekësore të Universitetit të Amsterdamit, në Holandë, tha se është e njohur se konsumi i lartë i kripës lidhet me presionin e lartë të gjakut dhe një rrezik të shtuar të sulmeve në zemër dhe goditjeve në tru.
“Këshillat shëndetësore janë fokusuar në kufizimin e marrjes së kripës. Por kjo është e vështirë të arrihet kur dietat tona përfshijnë ushqime të përpunuara. Në studimin tonë, kaliumi në dietë ishte i lidhur me përfitimet më të mëdha shëndetësore tek gratë”, shtoi Vogt.
Studimi përfshiu 11,267 burra dhe 13,696 gra të moshës 40 deri në 79 vjeç.
Pjesëmarrësit plotësuan një pyetësor mbi zakonet e jetesës, u mat presioni i gjakut dhe u mor një mostër e urinës.
Studiuesit analizuan lidhjen midis kaliumit dhe presionit të gjakut dhe zbuluan se konsumi i kaliumit, ishte i lidhur me presionin e gjakut tek gratë.
Në përgjithësi, ata zbuluan se njerëzit që kishin konsumin më të lartë të kaliumit kishin një rrezik 13% më të ulët të sëmundjeve kardiovaskulare krahasuar me ata që nuk kishin nivelet e duhura të mineralit.
Ushqimet e pasura me kalium përfshijnë perimet, frutat, arrat, fasulet, produktet e qumështit dhe peshkun. Për shembull, një banane 115 g ka 375 mg kalium, 154 g salmon i gatuar ka 780 mg, një patate 136 g ka 500 mg dhe një filxhan qumësht ka 375 mg.
Tracy Parker, dietologe në Fondacionin e Zemrës në Britani tha se ky hulumtim tregon se ngrënia e më shumë ushqimeve që përmbajnë kalium mund të jetë receta për një zemër më të shëndetshme. Gjetjet janë publikuar në Gazetën Evropiane të Zemrës.
Burimi:The Guardian/Përshtati:Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
