Gazeta Si – Nedim Bajrami shënon ndaj Interit. Mesfushori i Kombëtares shqiptare vuri firmën e tij në ‘San Siro’, ku Sasuolo fitoi me përmbysje 1-2, duke i shkaktuar skuadrës së Inzagit humbjen e parë në këtë kampionat. Zikaltrit barazohen në krye të Serinë A me Milanin, me nga 15 pikë.
Interi kaloi i pari në avantazh me Dumfris, por në pjesën e dytë gjithçka u përmbys dhe iniciatori ishte pikërisht Nedim Bajrami. Ai barazoi shifrat me një gjuajtje potente në zonë, duke mposhtur Somer, të cilit i shpëtoi topi nga duart. Pak minuta pas golit të barazimit, Bajrami u zëvendësua. Pastaj Berardi realizoi një gol mjaft të bukur, që i dha fitoren Sasuolos në Milano.
Kristjan Asllani, mesfushori kuqezi i Interit, nuk mori asnjë minutë në këtë sfidë nga trajneri Simone Inzagi.
— Telegram: @FootColicTG | Follow !! (@bagonato17438) September 27, 2023
Më parë Milani kishte fituar në fushën e Kaljarit me rezultatin 1-3. Një fitore me përmbysje e kuqezinjve, të cilët realizuan me Okafor, Tomori dhe Loftus Çik.
Sa u takon futbollistëve të tjerë të Kombëtares, portieri Berisha dhe sulmuesi Shpendi ishin titullarë në fitoren 1-0 të Empolit ndaj Salernitanës. Ismajli mungoi për shkak dëmtimi.
Berat Gjimshiti, si gjithmonë, i rëndësishëm për Atalantën, që fitoi 0-1 në Verona. Mbrojtësi kuqezi ishte lider në prapavijën bergamaske dhe u vlerësua me notën 7.5 për paraqitjen e tij. Elseid Hysaj u fut në fushë në minutat e fundit të ndeshjes Lacio-Torino, 2-0.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
