.png)
Përsëri ai, Novak Gjokoviç. Tenisiti serb ka kaluar në finale të “Australian Open”, pasi ka mundur pa vështirësi surprizën e turneut, Aslan Karatsev. Rusi, numri 114 në botë, nuk ka mundur të përballojë një Gjokoviç në një formë të shkëlqyer. Ndeshja ka përfunduar 6-3, 6-4 dhe 6-2 dhe ka zgjatur një orë e 53 minuta.
Problemet muskulore duken të largëta, ndërsa titulli i 18-të Slam duket shumë afër për Novak Gjokoviçin. Karatsev e mori ndeshjen pa frikë dhe pas pikës së parë në gejmin e tretë u gjend për herë të parë në karrierë në avantazh ndaj numrit 1 në botë. Serbi ka dominuar bindshëm, e tregon qartë rezultati, madje ka kursyer energji për finalen. Për Nolen ishte gjysmëfinalja e 9-të e luajtur dhe fituar në “Australia Open.
Nga 2014-a, tenisti serb ka fituar 14 gjysmëfinale nga 15 të luajtura, e vetmja humbje për të është ajo kundër Thiem në “Roland Garros 2019”. Të dielën do të luajë finalen e 9-të në “Australian Open”, një rekord më vete për të. Gjokoviç do të sfidojë fituesin e çiftit Stefanos Tsitsipas-Danil Medvedev. “Nuk jam ndjerë kurrë kaq mirë, është ndeshja më e mirë e turneut për mua dhe ka ardhur në momentin e duhur”, – tha Gjokoviç pas fitores.
Eliminohet Serena Uilliams, finalja Osaka-Bredi
Gjysmëfinalja ka dënuar sërish amerikanen Serena Uilliams, e cila është eliminuar nga japonezja Naomi Osaka. Brenda 75 minutash lojë, Osaka e ka mposhtur 39-vjeçaren 6-3, 6-4. Ndoshta dikush beson se herët a vonë Serena do ta fitojë turneun e 24-t Slam, por tashmë është në luftë me kohën, këtë e vërtetojnë edhe lotët e saj në konferencën për shtyp.
Pasi përshëndeti publikun në “Rod Laver Arena”, duke vendosur duart në zemër, Serena doli para gazetarëve, por pas disa pyetjesh u largua mes lotësh, duke lënë të nënkuptohet se fundi i karrierës së saj është afër. Pritej një ndeshje e madhe, por në fakt nuk ishte, sidomos nga ana e amerikanes.
Osaka u tregua e zonja, sidomos në setin e dytë, që e filloi me dy ejs me gati 200 km në orë. Japonezja ka siguruar finalen e 4-t Slam, pas “US Open 2018”, “Australian Open 2019” dhe “US Open 2020”. Në finalen e së shtunës Osaka do të ndeshet me amerikanen Xhenifer Bredi, e cila mundi Karolina Muçovën 6-4, 3-6, 6-4 në gjysmëfinalen tjetër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje