Gazeta Si –Një 17-vjeçar është arrestuar pas atentatit që ndodhi të shtunën në mbrëmje në Kamzë, pasi dyshohet se drejtonte makinën nga e cila u qëllua me armë zjarri në drejtim të një mjeti tjetër.
Nga hetimet, po ashtu dyshohet se adoleshenti, i nxitur nga disa persona të tjerë të përfshirë në këtë rast për të pranuar autorësinë, ka dhënë deklaratë të rreme.
“Si rezultat i veprimeve intensive hetimore të kryera në drejtimin e Prokurorisë, për zbardhjen e rrethanave të ngjarjes së ndodhur më datë 22.02.2025, në Kamëz, specialistët për Hetimin e Krimeve të Komisariatit të Policisë Kamëz kanë identifikuar, kapur dhe vënë në pranga një shtetas 17 vjeç, banues në Kamëz, për veprat penale “Veprime që pengojnë zbulimin e së vërtetës“, “Deklarata e rreme para oficerit të policisë gjyqësore” dhe “Drejtimi i automjetit në mënyrë të parregullt””, njoftoi policia.
Më herët, policia ka njoftuar se punon për të kapur tre persona të tjerë që janë identifikuar dhe shpallur në kërkim.
Mes tyre edhe Enedjon. K, i cili sipas policisë ishte shënjestër e atentatit. Ndërsa dy të kërkuarit e tjerë, Fabion. K e Dejvi. M, janë autorët që qëlluan me armë.
Dy autorët lëviznin me një makinë tip BMW, ndërsa shënjestra dhe persona të tjerë që ende nuk janë identifikuar lëviznin me “Land Rover”.
Dy 24-vjeçarët e shpallur në kërkim, Dejvi. M dhe Fabion. K rezultojnë të skeduar dhe të shoqëruar më parë për shpërndarje të lëndëve narkotike, ndërsa objektivi i atentatit nuk ka pasur precedentë penalë.
Deri më tani policia dyshon se mund të ketë ndodhur ndonjë konflikt mes të rinjve për lëndët narkotike, që mund të ketë ndikuar më pas edhe në përdorimin e armës së zjarrit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
