Gazeta Si – Jasir Asani, i zgjedhur nga trajneri Silvinjo që në grumbullimin e parë në krye të kuqezinjve, madje edhe titullar në dy ndeshjet e deritanishme, mund të lante sot për Maqedoninë e Veriut. E ka zbuluar këtë fakt trajneri aktual i skuadrës fqinje, Bllagoja Milevski.
“Jasir Asani ka pasur gjithmonë kualitet për të luajtur me kombëtaren, i ofruam gjithçka për të luajtur për Maqedoninë e Veriut. Ai ka luajtur për U-21 të Maqedonisë së Veriut, por për më pas ishte vendim i tij. Jasirit i dëshiroj çdo të mirë dhe suksese me përfaqësuesen që ka zgjedhur”, – u shpreh Milevski. Ai e donte me ngulm në skuadër, por ka lënë gjithçka në dorën e lojtarit për të zgjedhur, pa dashur të krijojë polemika.
Futbollisti i lindur në Shkup ka spikatur në kampionatin shqiptar me fanellën e Partizanit. Ai është 28 vjeç, por duhej të vinte Silvinjo në krye të Kombëtares shqiptare që të vishej kuqezi. Trajneri brazilian pëlqen shumë aftësitë teknike të sulmuesit anësor, që tashmë ka zënë vend në formacionin e Shqipërisë.
Asani ka shënuar tashmë edhe golin e parë me fanellën kuqezi. Ai realizoi golin e parë ndaj Moldavisë me një gjuajtje fantastike me të majtën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
