.png)
Presidenti amerikan Donald Trump deklaroi se vendet anëtare të NATO-s duhet të rrëzojnë avionë rusë, nëse këta shkelin hapësirën e tyre ajrore.
Deklarata u bë gjatë një takimi me presidentin ukrainas Volodymyr Zelensky, në kuadër të Asamblesë së Përgjithshme të OKB-së në Nju Jork.
I pyetur nëse Shtetet e Bashkuara do të mbështesnin një vendim të NATO-s për të ndërmarrë veprime të tilla ushtarake ndaj Rusisë, Trump u përgjigj:
“Po, e besoj këtë”, duke lënë të kuptohet se është i hapur për një qasje më konfrontuese nëse Rusia shkel kufijtë ajrorë të aleatëve të NATO-s.
Megjithatë, kur u pyet nëse do të mbështeste ushtarakisht aleatët e NATO-s në një përshkallëzim të mundshëm, Trump tha se “kjo do të varet nga rrethanat”.
Sa i përket marrëdhënieve me presidentin rus Vladimir Putin, Trump nuk dha një përgjigje të qartë nëse vazhdon ta besojë apo jo.
“Do t’ju them për këtë brenda një muaji”, tha shkurtimisht.
Gjatë deklaratave për shtyp përpara takimit, Trump u shpreh:
“E vlerësojmë këtë takim. Kishim një ditë shumë interesante dhe produktive. Tani kemi këtë takim të rëndësishëm me presidentin Zelensky, një njeri i guximshëm që po përballet me një luftë të vështirë. Kemi shumë respekt për Ukrainën dhe për qëndresën e saj. Është vërtet mbresëlënëse.”
Nga ana e tij, presidenti ukrainas Zelensky falënderoi Trump-in për mbështetjen:
“Faleminderit për këtë takim dhe për përpjekjet tuaja për të ndalur këtë luftë. Do të kemi një bisedë të veçantë për fëmijët ukrainas. Faleminderit edhe për përfshirjen personale të Zonjës së Parë, Melania Trump, në këtë çështje. Është shumë e rëndësishme për ne. Kam disa lajme të mira nga fronti dhe do t’ju informoj për zhvillimet. Natyrisht, qëllimi ynë është ta përfundojmë këtë luftë.”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
