Gazeta Si – Sezoni aktual po shkon shumë mirë për Arsenalin, që sot pret holandezët e PSV-së në Ligën e Europës. ‘Topçinjtë’ kanë 3 fitore në grup dhe u mjafton një pikë për të kaluar më tej.
Trajneri Mikale Arteta ka vendosur t’u japë hapësirë të rinjve sot dhe ka grumbulluar edhe një talent kuqezi. Maldini Kacurri është futbollisti shqiptar i thirrur nga trajneri spanjoll për sfidën e sotme. Ai sapo ka mbushur 17 vjeç dhe është pjesë e Arsenalit U-18, por është aktivizuar edhe me ekipin e 21-vjeçarëve.
Arteta do që të ruajë disa lojtarë për kampionatin dhe përfshiu në listë edhe tre të rinj, mes tyre edhe talentin kuqezi. Kacurri luan në pozicionin e qendërmbrojtësit dhe deri tani numëron dy ndeshje me Shqipërinë U-17.
Një lojtar me të ardhme dhe këtë e tregon qartë edhe thirrja në ekipin e parë të Arsenalit, pavarësisht se do të aktivizohet apo jo ndaj PSV-së. Në klubin londinez ai konsiderohet një nga talentet më premtues dhe sigurisht që është një lajm i mirë edhe për Kombëtaren tonë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
