.png)
Gazeta Si – Me urdhër të SPAK, është arrestuar këtë të premte në Shkodër Safet Bajri dhe u caktua masë tjetër sigurie “arrest në burg” për kushëririn e tij, Behar Bajri dhe krahun e djathtë të tij, Astmer Bilali, të cilët prej muajsh ndodhen qeli në kuadër të dosjes “Metamorfoza”, si të dyshuar në një grup kriminal.
Në një njoftim, SPAK bën me dije se urdhër-arrestet janë firmosur në lidhje me vrasjen e Fatbardh Licit, ngjarje e ndodhur në gusht 2018, pjesëtar i familjes rivale me Bajrat në Shkodër.
SPAK ka zbardhur edhe akuzar që rëndojnë ndaj tyre, “Vrasje me paramendim” kryer në formën e veçantë të bashkëpunimit, atë të grupit të strukturuar kriminal në dëm të viktimës Fatbardh Licin, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
SPAK thotë se të tre organizuan dhe vranë Fatbardh Licin, për të marë hak për vrasjen e ish-policit Boran Bërçana. Ky i fundit dyshohej se kishte lidhje me grupin Bajri dhe sipas SPAK, Behar Bajri i atribuon vrasjen e Boran Berçanës, Ibrahim Licit dhe për këtë ka vrarë për hakmarrje Fatbardh Licin.
Vrasja e Berçanës ndodhi më 15 korrik të vitit të 2018 dhe nuk është zbardhur ende, ndërsa u ekzekutua në makinë bashkë me partneren Silvi Ndoci, ndërsa fëmija 3-vjeçar shpëtoi.
Nga hetimet e kryera në kuadër të këtij procedim penal, i cili lidhet me disa ngjarje kriminale të ndodhura në qytetin e Shkodrës në vitin 2018, rezulton se janë mbledhur prova mbi të cilat është krijuar dyshimi i arsyeshëm se personat nën hetim; Behar Bajri; Astmer Bilali dhe Safet Bajri kanë planifikuar, organizuar dhe kanë kryer më 10.08.2018, në qytetin e Shkodrës, vrasjen me armë zjarri të shtetasit Fatmir Licit i afërm i shtetasit Ibrahim Lici. Motivi i vrasjes së tij dyshohet se lidhet ndër të tjera me atribuimin që shtetasi Behar Bajri, i bën shtetasit Ibrahim Lici për vrasjen e të njohurit të tij, shtetasit Boran Berçana”, njoftoi SPAK.
Dyshohet se Asmer Bilali dhe Behar kanë qenë të përfshirë në vrasjen e para 7 viteve të Fatbardh Licit si bashkëpunëtorë të Safet Bajrit.
Gjithnjë sipas burimeve, avokatët e tij kanë pohuar se Bajri është ndaluar me qëllim për t’ju marrë analizat e ADN, pasi dyshohet se ka gisht në vrasjen e Fatbardh Licit në vitin 2018 në mes të Shkodrës.
Avokati i Bajrit, Sokol Tahiraj në një prononcim për mediat është shprehur se klienti i tij nuk është arrestuar, por sipas tij ai është paraqitur vetë në Drejtorinë e Policisë së qarkut të Shkodrës.
Tahiraj nuk dha më shumë detaje, por shtoi se Safet Bajri ka ardhur në Tiranë sipas tij për marrjen e kampionit të ADN-së.
“Është për një çështje që është gjykuar një herë. Nuk kam materiale më tepër. Po e theksoj edhe njëherë edhe për mediat edhe për publikun nuk është thirrur në telefon, por është paraqitur vetë në Drejtorinë e qarkut të Shkodrës. Aty është bërë me dije për një kampion ADN-je. ADN do e merrte në Tiranë dhe në atë moment ka ardhur në Tiranë i shoqëruar nga policia. Nuk është arrestuar, por ka vajtur vetë”, shprehet avokati i Safet Bajrit, Sokol Tahiraj.
Ndërkohë, pak ditë më parë, me urdhër të SPAK, RENEA kreu kontrolle në disa vende në Shkodër, mes të cilave edhe në banesën e Safet Bajrit.
Kontrollet u kryen për llogari të hetimeve për masakrën e Dobraçit, ku në një atentat humbën jetën Hamza Lici e Arlind Bushati, si dhe çifti i i bashkëshortëve Bashkim e Flutura Basha.
Një tjetër ngjarje kriminale për të cilën po hetohet Safet Bajri dhe anëtarë të tjerë të grupit “Bajri”, është edhe përplasja me armë zjarri në Bushat të Shkodrës më 23 gusht 2024.
Disa anëtarë të grupit Bajri, një pjesë e të cilëve të identifikuar nga SPAK, Izmir Sakica dhe Samuel Troshani, të armatosur deri në dhëmbë dhe me makina të blinduara, kishin organizuar gjithçka për të vrarë rivalin e tyre, Aleksandër Prendin dhe familjarët e tij.
Ky i fundit ju përgjigj grupit me plumba dhe nga përplasja me armë zjarri nuk pati viktima apo të plagosur.
Prej të paktën dy dekadash, fiset Bajri dhe Lici, të njohur në qytetin e Shkodrës, kanë një historik të përgjakshëm përplasjesh, me një sagë të gjatë vrasjes mes të dy grupeve kriminale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
