.png)
Nga Gazeta ‘Si’ – Kryeministri Edi Rama e cilëson arrestimin e kryebashkiakut të Tiranës, Erion Veliaj, si një burgosje pa gjyq, teksa sqaroi se Partia Socialiste nuk do të jetë zyrë avokatie e askujt.
Përmes një reagimi tjetër në rrjetet sociale, Rama u shpreh se gjykimi i Veliajt mund të vazhdonte në gjendje të lirë, pasi kryebashkiaku ka një kontratë me zgjedhësit.
Kreu i qeverisë theksoi se “askush nuk ka për të na tërhequr dot në debate politike për SPAKUN e për GJKKO, sepse mes nesh dhe kënetës është kufiri mes dy botëve; asaj të drejtësisë së re europiane që duam ne, me pavarësi të plotë nga pushteti politik e me standarte demokratike, dhe asaj të drejtësisë së vjetër vulgare që do bufi me kënetën e tij, me kontroll të plotë politik e me pazare si ato që e bënë këtë vend për 100 vjet mbretërinë e padrejtësisë”.
Kanalet kërkuakan debate PS – PD për rastin e Erionit, pra nuk paskan kuptuar akoma se ne kemi kaluar nga pesë vjet heshtje në një fazë të re, kur do t’i japim vetes të drejtën të japim opinionet tona konstruktive për standartet dhe shkeljet në procese, por nuk kemi ndryshuar…
— Edi Rama (@ediramaal) February 12, 2025
Sipas tij, SPAK po pret me urgjencë ‘kokën e Tiranës’ ndërsa prej 5 vitesh që nga krijimi i tij nuk ka dhënë drejtësi për 21 janarin.
“Këtë lloj debati do ta bëjmë në popull, në rrugën drejt 11 majit, në mbështetje të plotë të SPAK e GJKKO kundër korrupsionit dhe patjetër, pa heshtur për shqetësimet që krijohen nga gabimet apo fajet në raport me standartet ose fjala vjen nga fakti që befas, bëhet me urgjencë prerja e kokës së Tiranës kur kemi hyrë në zgjedhje, ndërsa pesë vjet nga krijimi i tij SPAKU s’ka asnjë urgjencë për të dhënë drejtësi për 21 janarin!
Ja kështu dhe përveç spektaklit të sharjeshpifjeve e të teorive idiote të konspiracionit në ato kanale, shërbejini pak edhe të vërtetës, duke kërkuar ku janë provat, a mjaftojnë a s’mjaftojnë, a janë a s’janë kushtet për burg pa gjyq e me radhë, por jo me partitë politike e aq më pak me kënetën opozitare”, shkroi ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
