Arqipeshkvi George Frendo po e fiton betejën me Covid-19, teksa po vijon trajtimin në një spital të Barit në Itali.
Konferenca Ipeshkvore e Shqipërisë njofton se Imzot Frendo ka shfaqur ditën e sotme një përmirësim të ndjeshëm të frymëmarrjes.
“Tashmë me komunikimet e përditshme që kemi me Arqipeshkvin Metropolit SH. T. Imzot George Frendo, informojmë se gjendja fizike e tij është drejt një rikuperimi të plotë, po ashtu edhe situata e frymëmarrjes po bëhet gjithnjë e më autonome”, thuhet në njoftim.
Po ashtu në njoftim zyrtar theksohet se ai po rimerr forcën dhe energjinë teksa të afërmit, mbështetësit dhe besimtarët i japin kurajë për një rikthim më të shpejtë në Dioqezë.
“Imzot Frendo ndihet shumë më mirë dhe, forca dhe energjia të cilat po i rimerr përmes kujdesit mjekësor si dhe përmes lutjes – me të cilën Zoti vazhdon ta ushqejë – i japin kurajë për një rikthim më të shpejtë në Dioqezë.
Falënderojmë Zotin për shëndetin e tij dhe vazhdojmë të lutemi për këdo që në këto momente po përballet me një sëmundje të tillë dhe për çdo operator sanitar i angazhuar në kujdesin ndaj të sëmurëve”, mbyllet njoftimi i Konferencës Ipeshkvore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
