Gazeta Si – Gjykata e Apelit të Posaçëm, urdhëroi këtë të mërkurë rikthimin në qeli të ish-kryebashkiakut të Lushnjës Fatos Tushe një muaj pas lirimit të tij.
Shkak është bërë vendimi i Gjykatës së Shkallës së Dytë, e cila ka vendosur një shtesë dënimi ndaj ish-zyrtarit prej 12 muajsh, të cilën ai tashmë duhet ta vuajë për shkak të akuzës së abuzimit me tenderët.
Më parë, nga Shkalla e Parë, Tushe ishte dënuar vetëm për shpërdorim detyre dhe lejim të ndërtimeve pa leje, kur u dënua me 2 vite e 4 muaj burg.
LEXO EDHE:
– Nga kanali vaditës, karburanti dhe shtëpia e fshatarit, abuzimet që fundosën Fatos Tushen
– “Me shefin jam unë, për kafe”, kryebashkiaku i Lushnjës, mik me fituesin e tenderit
Ndërkohë, që Apeli sot e shpalli fajtor edhe për akuzën tjetër. Si përfundim, Fatos Tushe është dënuar me 5 vite burgim dhe në aplikim të gjykimit të shkurtuar, dënimi i tij është 3 vite e 4 muaj burg.
Tushe e kishte kryer dënimin e mëparshëm, ndërkohë që tani do të duhet të rikthehet në burg, për të vuajtur dënimin edhe me 12 muaj.
Pas shpalljes së këtij vendimi, pritet të firmoset urdhri i arrestit dhe Tushe do duhet të kthehet në qeli për të kryer edhe një tjetër vit dënimi me burg.
Apeli i GJKKO ka vendosur gjithashtu konfiskimin dhe kalimin në pronësi të shtetit përfundimisht të shumave monetare të gjetura në shtëpitë e Fatos Tushes, Flamur Peqinit, Gentian Nushit dhe Ilva Billos.
Tushe u arrestua me 6 korrik 2021 për abuzim me një tender me vlerë 24 milionë lekësë bashku me ish-vartësit e tij për rehabilitimin e një kanali vaditës në njësinë administrative Kolonjë.
Tenderi dyshohet të ishte fituar në mënyrë fiktive nga një kompani, ndërsa punimet në terren u kryen nga një tjetër kompani e administruar nga Ibrahim Lami, që sipas SPAK, privilegjohej në tenderimet e Bashkisë Lushnjë.
Ndërsa “shpërdorimi i detyrës” nga Tushe, dyshohet të jetë bërë përmes shpërdorimit të karburantit të bashkisë dhe lejimit të një ndërtimi pa leje.
Ai u përgjua nga SPAK, teksa lejonte dhënien e sasive të karburantit personave të paautorizuar, si edhe porositë ndaj një qytetari që po ndërtonte pa leje, “thuaji që kam folur me shefin”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
