Nga Gazeta ‘Si’- Kreu i Partisë së Lirisë, Ilir Meta, i është drejtuar Gjykatës së Lartë për zbutjen e masës “arrest në burg” të caktuar ndaj tij me kërkesë të SPAK.
Avokatët e ish-presidentit kanë depozituar pranë kësaj gjykate ankimimin e masës. Gjykata e Lartë ka regjistruar rekursin e bërë nga mbrojtja e Metës.
Pritet që ditët në vijim të caktohet data dhe trupa gjykuese për shqyrtimin e rekursit. Meta kërkon prishjen e vendimit të dy shkallëve të tjera të gjyqësorit.
Ndërkohë, GJKKO ka caktuar datën 25 shtator, ora 11:00, për zhvillimin e seancës së parë paraprake në ngarkim të ish-presidentit Meta dhe katër personave të tjerë që janë marrë të pandehur nga SPAK. Kërkesa do shqyrtohet nga gjyqtarja Irena Gjoka, e cila u caktua nga shorti elektronik që u hodh javën e kaluar.
Gjoka do shqyrtojë kërkesën e SPAK për të kaluar dosjen për gjykim, ndërkohë që ka në dorë edhe dy opsione të tjera, ta kthejë sërish dosjen në Prokurorinë e Posaçme ose të pushojë hetimet. SPAK ka marrë të pandehur Ilir Metën, Monika Kryemadhin, nënën e saj Fatime Kryemadhi, Pirro Xhixhon dhe Ema Çokun.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
