.png)
Nga Gazeta Si – Sukses jo vetëm planetar, por periodik, për gati tri dekada. Që kur u publikua për herë të parë 28 vjet më parë, kënga “All I Want for Christmas is You” nga Mariah Carey e ka lejuar këngëtaren (dhe të gjithë zinxhirin, nga kompania diskografike e poshtë) të fitojë çdo vit, me afrimin e periudhës së Krishtlindjes, mbi dy milionë dollarë. Një shifër e konsiderueshme, po të kihet parasysh se ky sukses ciklik duket se nuk shuhet kurrë.
E përjavshmja britanike “The Economist” është në fakt e para që vlerëson fitimet e përgjithshme prej gati tridhjetë vjetësh për atë që është bërë një nga këngët më të dëgjuara në dhjetor: rreth 60 milionë dollarë (deri në vitin 2016, ‘kështu që sot mund të jenë të paktën 72 milionë’ shkruan revista Rolling Stone), një pasuri autentike që është gati të rritet edhe në vitin 2022, me vetë hitin që tashmë është rikthyer për t’u ngjitur në top listat botërore.
Kënga e festave
Nga vitet 1990 e deri më sot, shtëpitë në mbarë botën janë mbushur me këtë ritëm (që nga publikimi i parë më 1 nëntor 1994), i cili mbështetet pak te romanca dhe pak te fryma e Krishtlindjes. Midis videoklipeve dhe rasteve publike në të cilat përsëritet vazhdimisht, në çdo kontekst, kënga identifikon elementë dhe gjeste si bora, një bredh për t’u dekoruar dhe takime familjare, duke e bërë Carey të jetë ndër të paktat që mund të fitojë më shumë sesa mund të shpenzojë gjatë sezonit të festave.
Një këngë e vetme i garanton asaj rreth 2.5 milionë dollarë çdo dhjetor, megjithëse ky hit i famshëm, çuditërisht, arriti e para në renditje në Shtetet e Bashkuara të Amerikës vetëm në vitin 2019. Tani, pikërisht në këto ditë të 2022-shit, u rikthye “All I Want for Christmas is You” në pesëshen më të mirë në mbarë botën.
Fenomen global
Prandaj nuk duket e pazakontë se si kënga mund të ketë kombinuar, apo edhe lënë mënjanë, këngë të tjera të famshme të traditës së Krishtlindjeve si “Jingle Bells” dhe kështu është vendosur si një nga këngët single më të shitura ndonjëherë, edhe pse fillimisht ishte pjesë e albumit të katërt në studio të Carey, “Merry Christmas”. Teknikisht, suksesi i saj i detyrohet edhe një kombinimi virtuoz dhe modern të tingujve të ndryshëm dhe të pazakontë të instrumenteve të ndryshëm, si kambanat tradicionale dhe sintetizuesit bashkëkohorë.
E gjithë kjo përtej një teksti që, për nga kuptimi, mishëron në mënyrë të përsosur frymën tradicionale të Krishtlindjes (thuhet se është shkruar në më pak se 15 minuta), sepse të thuash “Gjithçka që dua për Krishtlindje je ti”, është mënyra më e mirë për të humbur interesin në dhuratat materiale dhe pretendojnë rëndësinë e dashurisë personale, njerëzve që duam, me të cilët të kalojmë festat më të bukura. /Il Corriere della Sera/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
