.png)
Nga Gazeta Si- Policia ka reaguar një ditë pasi Komiteti i Helsinkit, përmes një deklarate zyrtare, ka kërkuar që të hetohej rasti i dhunës në Komisariatin numër 1 në Tiranë ndaj një 14-vjeçari, i cili më 12 prill ishte shoqëruar nga policia pasi ishte kapur duke hedhur kapsolla.
Policia e Tiranës informon se një ditë pas shoqërimit të të miturit dhe pretendimeve të tij për dhunë, ka nisur hetimi disiplinor ndaj 3 efektivëve për shkelje të rëndë:
-Inspektor D. M., oficer i Patrullës së Përgjithshme të Komisariatit të Policisë Nr. 1;
-Inspektor R. D., oficer i Patrullës së Përgjithshme të Komisariatit të Policisë Nr. 1;
-Nënkomisare Xh. B., specialiste e Seksionit të Patrullës së Përgjithshme dhe Rendit të Komisariatit të Policisë Nr. 1.
Gjithashtu, policia thotë se Agjencia e Mbikëqyrjes Policore ka referuar materialet në Prokurori, me qëllim hetimin penal të 3 punonjësve të Policisë, për veprat “Kryerja e veprimeve arbitrare” dhe “Dëmtime të tjera me dashje”.
Ndërkohë, sipas policisë, edhe Drejtoria e Standarteve Profesionale ka nisur një hetim administrativ, për të verifikuar nëse 3 punonjësit e Policisë kanë shkelur kompetencat dhe detyrimet që iu caktojnë rregullorja e Policisë së Shtetit dhe procedura standarde e punës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
