.png)
Nga Gazeta 'Si'- Ministri i Punëve të Brendshme, Xhelal Sveçla, u është përgjigjur kritikave të Departamentit të Shtetit dhe vendeve të QUINT-it, të cilët shprehën indinjatën me aksionet e Policisë së Kosovës në veri të vendit.
Sveçla, në një prononcim i ka quajtur brenga e jo kritika mospajtimet e partnerëve ndërkombëtarë për veprimet në komunat veriore.
“Nuk ka kritika, ka brenga të cilat kohë pas kohë ata i shfaqin. Ne bashkëpunojmë ngushtë më të gjithë, i kuptojmë brengat e tyre, por po ashtu qeveria e Republikës së Kosovës ka obligim qoftë ndaj gjeneratave të tanishme, por edhe brezave të ardhshëm që njëherë e përgjithmonë situatën atje ta stabilizojë në të mirë dhe rendit e ligjit”, ka thënë Sveçla.
Kreu i Ministrisë së Brendshme thotë se në atë pjesë janë duke vepruar për rikthimin e qetësisë, rendit dhe ligjit.
“Atje është qetë është situatë e brishtë, por Policia e Kosovës është tregu jashtëzakonisht e zonja që të menaxhojë dhe të ballafaqohet me të gjitha sfidat”, ka thënë Sveçla.
Sveçla ka lavdëruar organet e rendit për menaxhimin e situatës në komunat veriore.
“Me përvojën e fituar me kapacitete të angazhuara mbi të gjitha me vullnetin e pashoq të secilit pjesëtarë të Policisë së Kosovës, cilado sfidë e ardhshme do të menaxhohet në mënyrën më të mirë të mundshme. Policia atje është duke siguruar rend dhe ligj për t’u shërbyer qytetarëve”, ka thënë ministri Sveçla.
Kritikat e faktorit ndërkombëtar erdhën pas një aksioni të Policisë së Kosovës në veri të vendit, ku u mbyllën disa filiale të bankës së Serbisë që operonte në katër komunat e asaj pjese.
Sveçla këtë aksion e vlerësoi si të duhur për largimin e mekanizmave të Serbisë nga Kosova.
Në këtë aksion të policisë së Kosovës ishin konfiskuar rreth 1.6 milion euro, mbi 74 milionë dinarë (rreth 630 mijë euro), mbi 19 mijë franga e mbi 13 mijë dollarë amerikanë, si prova materiale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
