Gazeta Si – Gjykata e Tiranës vendosi të lërë në burg Elinta Garon për 30 ditë deri në kryerjen e ekspertizës auto-teknike të automjetit që ajo drejtonte.
29-vjeçarja është përlotur në sallë dhe nuk ka pranuar se ka qenë duke përdorur celularin në momentin e aksidentit që i mori jetën 60-vjeçarit Begzan Hyseni.
Aksidenti ndodhi të hënën datë 15 gusht në zonën pranë “Kodrës së Diellit”, ku si pasojë e humbjes së kontrollit, e reja përplasi 4 persona, çiftin Begzan dhe Valentina Hyseni, 27-vjeçaren Alkuna Telaj, dhe një fëmijë.
Nga humbja e kontrollit të mjetit, e reja ka përplasur edhe një 2-vjeçar me inciale R.M., që ndodhej në karrocë teksa shoqërohej nga nëna e tij.
Fëmija ka marrë dëmtime të lehta në ballë. Nëna e të miturit, me iniciale G.M., ka treguar se sapo pa që mjeti ka përplasur disa persona është munduar të shmangej dhe fëmija u lëndua.
Valentina Hysi që mbeti e lënduar, në dëshminë e saj ka thënë se mban mend vetëm që mjeti erdhi në drejtim të tyre dhe i përplasi në rrugën “Muharem Butka”.
Fatkeqësisht, 60-vjeçari nuk i mbijetoi dot plagëve të marra dhe humbi jetën në Spitalin e Traumës, ndërkohë të aksidentuarit e tjerë kanë lënë spitalin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
