.png)
Gazeta Si – Ajola Xoxa, bashkëshortja e kryebashkiakut të Tiranës, Erion Veliaj, ka bërë rekurs në Gjykatën e Lartë, ku kundërshton vendimet e Gjykatës së Posaçme dhe të Apelit, të cilat legjitimuan kontrollet e ushtruara me urdhër të SPAK në bizneset e saj në kuadër të një hetimi pasuror të nisur dhjetorin e shkuar.
Në këtë gjykatë, Xoxa pretendon paligjshmëri të kontrolleve dhe kthim të telefonit të sekuestruar.
Më herët, Gjykata e Posaçme e Apelit vendosi të mos pranojë ankimin e bërë nga Ajola Xoxa dhe Arbër Veliaj për kontrollet e ushtruara në datën 6 dhjetor.
Më konkretisht bëhet fjalë për kontrollet e ushtruara nga oficerët e BKH-së në banesat e Arbër Veliajt dhe familjarëve të Ajola Xoxës, si dhe në zyrat e fondacionit “Harabel”.
Familjarët e ish-kryebashkiakut, kishin ankimuar vendimin që lejoi kontrollet si të paligjshëm dhe pa shkak ligjor, pasi më herët edhe Gjykata e Posaçme e kishte rrëzuar kërkesën.
Kontrollet u ushtruan në lidhje me hetimin e nisur nga dy prokurorët Altin Dumani dhe Ols Dado ndaj kreut të Bashkisë së Tiranës, Erion Veliaj.
Në fund të dhjetorit 2024, kryebashkiaku Erion Veliaj u pyet për mbi 5 orë nga hetuesit e posaçëm, 3 ditë pasi në godinën e SPAK ishte pyetur edhe bashkëshortja e tij, Ajola Xoxa.
Sipas SPAK, nga kallëzimi i bërë ndaj Veliajt, ekzistojnë të dhëna konkrete për 4 akuza lidhur me këtë çështje, konkretisht “korrupsion pasiv dhe aktiv, pastrim parash dhe fsheje pasurie”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
