.png)
Gazeta Si – Ajola Xoxa, bashkëshortja e kryebashkiakut të Tiranës, Erion Veliaj është paraqitur mëngjesin e kësaj të premteje në SPAK në zbatim të masës së sigurisë “detyrim paraqitje”.
Xoxa akuzohet për pastrim parash dhe fshehje pasurie, ndërsa në seancën e mbajtur në GJKKO më 12 shkurt iu caktua zbutje e masës së sigurisë nga “arrest shtëpie” në “detyrim paraqitje” për shkak se i duhej të dërgonte djalin në shkollë.
Referuar SPAK, është krijuar dyshimi se Veliaj dhe bashkëshortja e tij kanë kryer veprime korruptive, si dhe pastrim të produkteve të veprës penale. Ndërkohë, me vendim të GJKKO-së, ndaj Veliajt është lënë në fuqi masa e sigurisë “arrest me burg”. Ai ndodhet në paraburgimin e Durrësit.
Ditën e djeshme, GJKKO rrëzoi kërkesën e Ajola Xoxës për kthimin e celularit të sekuestruar dhe kundërshtimin e bërë prej saj për kontrollet e BKH në apartamentin në “Sky Tower” ku u sekuestruan sende të rëndësishme për hetimin.
Një ditë më parë në SPAK u paraqit Valbona Xoxa e ëma e Ajola Xoxës për t’u pyetur lidhur me transaksionet e së bijës dhe vilën në Qerret për të cilën Veliaj dhe bashkëshortja e tij pretendojnë se nuk është në pronësinë e tyre.
Sipas dosjes së SPAK, Xoxa dhe Veliaj ngritën një skemë komplekse për të përvetësuar fondet e bashkisë Tiranë nëpërmjet pagesave që institucioni bënte kundrejt kompanive të biznesmenëve të ndryshëm dhe më pas këta të fundit i dërgonin në organizatat e Ajola Xoxës.
Vetë Xoxa ka reaguar së fundmi në një postim në rrjetet sociale ku pretendon se ndaj saj po bëhet një padrejtësi dhe se shifrat e pagesave prej 860 mijë eurosh janë të fryra me qëllim nga prokurorët e SPAK.
Kreu i Bashkisë së Tiranës dyshohet për kryerjen e veprës penale të “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
