Rënia e mbështetjes për CDU-në e kancelares Angela Merkel në dy zgjedhje rajonale të dielën sinjalizoi se një skandal korrupsion dhe disa hapa të gabuar gjatë pandemisë mund të kërcënojnë mbajtjen e pushtetit në zgjedhjet kombëtare këtë shtator.
Partia e qendrës së djathtë pësoi rezultatet më të këqija në historinë e saj në Baden-Württemberg, rajoni më industrial i vendit, si dhe në Rhineland-Palatinate, një shtet i vogël perëndimor në kufi me Francën ku Helmut Kohl nisi karrierën e tij politike.
Bashkimi Demokristian (CDU), shpesh i përshkruar si “Volkspartei” i fundit i Gjermanisë, humbi rreth 15 për qind të mbështetjes së saj krahasuar me zgjedhjet e mëparshme në vitin 2016 në të dy shtetet, një rënie historike që udhëheqësit e partive nuk bënë asnjë përpjekje për ta zbutur.
“Duhet të jemi të sinqertë, CDU regjistroi një rezultat katastrofik,” tha Susanne Eisenmann, kandidatja kryesore e CDU në Baden-Württemberg, për humbjen e saj.
Shfaqja e dobët e CDU mund të nënkuptojë se kandidati i preferuar i Merkel për ta pasuar atë si kancela, udhëheqësi i ri i partisë Armin Laschet, nuk do të ketë as një shans për të kandiduar. Laschet, Kryeministri i Nordrhein-Westfalen, po garon kundër Markus Söder, udhëheqësit të Unionit Social Kristian (CSU), për të qenë kandidati i konservatorëve në fushatën e ardhshme. Me Söder mjaft përpara në sondazhe për sa i përket favorizimit, Laschet kishte nevojë për një nxitje të madhe të Dielën që nuk e mori.
Pavarësisht se kush përfundon duke kandiduar, konservatorët, të cilët kanë udhëhequr qeverinë federale për 16 vjet nën Merkel, përballen me kërcënimin më të madh për dominimin e tyre në një brez. Trajtimi i pandemisë, i vlerësuar gjerësisht në fazat fillestare të krizës, është vënë nën kritika kohët e fundit mes zhgënjimit për kufizimet e vazhdueshme dhe ritmit të ngadaltë të vaksinimeve.
Demokristianët janë konsideruar prej kohësh në Gjermani si partia që di të drejtojë. Megjithatë, gjatë pandemisë, jo gjithçka ka shkuar sipas planit. Nga një aplikacion gjurmimi i sponsorizuar nga qeveria i prezantuar vitin e kaluar që nuk funksionoi, tek dështimi për të siguruar ndihmë emergjente për firmat e vogla, konservatorët kanë dështuar në mënyrë të përsëritur. Kohët e fundit, qeveria e udhëhequr nga CDU ka luftuar për të mbajtur premtimin për të ofruar teste për COVID-19 falas.
“Ne kemi shumë për të përmirësua,” pranoi Michael Kretschmer, Kryeministri i CDU i Saksonisë, në një intervistë me televizionin publik gjerman pasi rezultatet e zgjedhjeve erdhën.
Sado i dëmshëm ka qenë trajtimi i krizës shëndetësore, goditja më e madhe në zgjedhjet e së dielës u duk se erdhi nga skandali i korrupsionit me të cilin përballet. Gjatë javës së kaluar, tre deputetë konservatorë kanë dhënë dorëheqjen nga partia e tyre ose pozitat parlamentare mes akuzave për abuzim me detyrën. Një tjetër deputet, Axel Fischer, iu pezullua imuniteti parlamentar mes një hetimi penal nëse kishte marrë ryshfet nga Azerbajxhani. Ai mohon çdo gjë.
Asnjë nga katër rastet duket se nuk është i lidhur, por dy prej tyre përfshijnë akuza se deputetët pranuan qindra mijëra euro për të siguruar kontrata qeveritare me prodhuesit e maskave. Një nga deputetët, Georg Nüßlein, shërbeu si nënkryetar i grupit parlamentar të konservatorëve deri në dorëheqjen e tij javën e kaluar. Ai është nën hetim për evazion fiskal dhe krime të tjera, akuza që ai i mohon.
Është e panevojshme të thuhet se fakti që deputetët konservatorë përfituan nga marrëveshjet për furnizimin me mjete mbrojtëse mjekësore gjatë pandemisë është diçka që u ka lënë shije të hidhur votuesve. Pyetja është nëse partia do të arrijë të lëvizë përtej këtij skandali përpara ditës së zgjedhjeve.
Skandali ka hedhur në qendër të vëmendjes atë që kritikët thonë se është korrupsioni endemik në një parti që ka qenë në pushtet për shumë kohë. Në përgjigje të asaj kritike, udhëheqja parlamentare e konservatorëve paraqiti një reformë me 10 pika javën e kaluar për të vendosur kufizime të ashpra në fitimet anësore të deputetëve dhe u bëri thirrje të gjithë anëtarëve të fraksionit të tyre të nënshkruajnë një premtim që konfirmon se ata nuk kishin bërë ndonjë para nga marrëveshjet që përfshijnë maska kirurgjikale. Por lëvizjet bënë pak për të qetësuar kritikat.
“Ky skandal vjen pas viteve të tëra të bllokimit të çdo përpjekje për të arritur më shumë transparencë dhe për të futur dënime të ashpra për deputetët që marrin rryshfet,” tha Norbert Walter-Borjans, bashkë-drejtues i Social Demokratëve (SPD) ), partnerët e vegjël në qeverinë e Merkel.
Deputetët konservatorë nuk janë politikanët e vetëm gjermanë që mbushin pagat e tyre në Bundestag me të ardhura të jashtme, por si parti në pushtet, CDU po përballet me më shumë kontroll dhe ka edhe më shumë për të humbur. Është e pashmangshme që çështja e korrupsionit politik do të dominojë fushatën e ardhshme së bashku me përballimin e pandemisë.
Konservatorët mund të luftojnë ende për të mbajtur pushtetin. Ata ende udhëheqin sondazhet kombëtare me një diferencë të fortë, 14 pikë përqindje, megjithatë zgjedhjet rajonale të së dielës ilustruan se sa e brishtë mund të jetë mbështetja e tyre.
Në landin e Baden-Württemberg, CDU aktualisht shërben si partneri i ri në një koalicion me të Gjelbrit. Paraqitja e dobët e së dielës (CDU përfundoi e dyta me rreth 24 për qind, prapa të Gjelbërve me rreth 33 për ind, sipas rezultateve të hershme) jo vetëm që shoi shpresat e partisë për të rimarrë bastionin e saj të dikurshëm, por gjithashtu ngriti dyshime nëse do të kishte ndonjë rol në qeverinë e ardhshme.
*Burimet: “Der Spiegel”, Politico.Eu, “Le Monde”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
