A ka dështuar Hollivudi me Gjeneratën Z?

Nga Gazeta Si - Të gjithë kanë mendimet e tyre për Gjeneratën Z – e njohur si Gen Z shkurt, grupi i lindur në mes viteve 1990 deri në fillim të viteve 2010 – brezi që u rrit në internet dhe që përdor mediat sociale si ditarin dhe librin e tij të shënimeve. Ata konsiderohen si të varur nga teknologjia dhe të varur nga pajisjet, pasi kanë ardhur në jetë në një epokë ekranesh që na inkurajojnë të “jemi realë” dhe të ndajmë gjithçka, me të gjithë, gjatë gjithë kohës.

Tani Hollivudi duket se ka një mision për t’u përballur me zgjedhjet e Gjeneratës Z dhe për të kapur arsimimin gjithnjë në zhvillim në internet dhe kulturën sociale virtuale.

Përcaktimi i kategorisë së një filmi si i kësaj gjenerate mbetet i pakapshëm.

Risia më e fundit në universin kinematografik të Gjeneratës Z është komedia e zezë e Netflix-it “Do Revenge”.

Regjisorja Jennifer Kaytin Robinson ofron një mishërim të kësaj gjenerate me një dramë të errët adoleshentësh të vendosur në skenën sociale të një shkolle private në Majemi (SHBA).

Estetika ndeshet me një mprehtësi narrative, teksa sajohen skema hakmarrëse duke theksuar dallimin mes të jetuarit dhe të paraqiturit.

“Do Revenge” shqyrton dinamikën e paqëndrueshme sociale të Gen Z pasi Drea (Camila Mendes) bie nga lartësitë e elitës popullore të shkollës. Ndërkohë, Eleanor (Maya Hawke), është nxënësja e re në shkollë, një lezbike introverte që po kërkon hakmarrje për një gënjeshtër homofobike që rrënoi rininë e saj.

Në përpjekjen për të trajtuar pakënaqësitë e adoleshentëve, “Do Revenge” përfundon duke u shfaqur joautentik, pasi tekstura e rinisë duket e lustruar me shkëlqim.

Në praktikë, “Do Revenge” është aq i etur për të zgjidhur patologjinë e rinisë, saqë nuk arrin të përmbysë vërtet stereotipet e Gen Z. Ndërsa qasja feministe e filmit dhe personazhet lezbike mund të lavdërohen, nuancat e jetës adoleshente nuk hulumtohen: Izolimi i dhimbshëm i Eleanorës përshkruhet si misterioz dhe pozicioni i Dreas si viktimë e pornografisë hakmarrëse reduktohet në një pikë komploti.

Adoleshenca është më shumë e vëzhguar sesa e jetuar. Siç thotë shkrimtarja Jihane Bousfiha për ‘BBC Culture’: “Shumica e mediave të përqendruara në brezin tonë priren të humbasin fillin, sepse njerëzit që bëjnë filmat përfundojnë duke u kapur pas idesë se si është sjellja e Gen Z”.

Ndërsa “Do Revenge” është i vetëdijshëm për Gjeneratën Z, ai ka ende një perspektivë tjetër për të rinjtë e sotëm, një këndvështrim që është i shqetësuar për dëshirën e tyre të dukshme për popullaritet dhe që ka një fokus të vizionit në kulturën e anulimit.

Në Bodies Bodies Bodies, një "festë uragani" në një rezidencë bëhet vdekjeprurëse pasi një grup luan një lojë "vrasje në errësirë"

Të jetosh online

Në një film tjetër të ri që kap marrëdhënien e Gjeneratës Z me mediat sociale, komedia e zezë e Quinn Shephard 2022 “Not Okay” e çon temën e aktivizmit performativ në lartësi të reja. Danni (Zoey Deutch), një grua e re që dëshiron stilin e jetës së influencueses, mbështillet në një gënjeshtër teksa hiqet si e mbijetuar e një sulmi terrorist.

Një temë e zakonshme në këta filma është decentralizimi i heroit të bardhë mashkull të Hollivudit. Një tjetër rikalibrim kinematografik ky i Gen Z, ku gratë me ngjyrë janë në role kryesore dhe marrin përsipër një pjesë më të madhe të tregimeve. Investimi i Hollivudit në Gen Z sheh një hapësirë të krijuar për të rinjtë e sotëm të ndryshëm në një botë që duket e papërgatitur për t’i përqafuar ata. “Një vështrim në kastet e tyre të larmishme racore dhe etnike na tregon shumë... ata funksionojnë si përshtatja e përsosur me pikëpamjet e tyre satirike të errëta mbi reflektimet bashkëkohore mbi seksualitetin, famën dhe dhunën”, thotë Dr. Christopher Holliday, lektor në Artet Liberale dhe Vizuale në Universitetin e Londrës. Megjithatë, ai shton: “Dëshira që disa identitete të margjinalizuara të bëhen të dukshme është një imperativ që gabimisht mund të barazojë dukshmërinë me përparimin, gjë që nga ana tjetër ngre pikëpyetje në lidhje me barrën e një individi për të përfaqësuar kolektivin dhe, si rezultat, kush mund – dhe duhet – të ketë fuqinë për të folur për një identitet apo grup të caktuar shoqëror”.

Euphoria – e cila u shfaq në vitin 2019 – ka mbledhur polemika për përmbajtjen e saj seksuale

Gjenerata Z nuk po shkakton tronditje vetëm përmes përfaqësimit.

Lëvizshmëria e filmit dhe televizionit nëpër platformat e transmetimit krijon akses sipas kërkesës për një brez tashmë të vendosur në internet.

Kjo reflektohet në të dhënat e audiencës: Gjenerata Z po mirëpret opsionin e platformave të shikimit sipas kërkesës, me më shumë se nëntë nga dhjetë persona të kësaj gjenerate të SHBA-ve të abonuar në të paktën një shërbim.

Një raport i Ofcom i bën jehonë këtij ndryshimi brezash në Mbretërinë e Bashkuar, me 59 për qind të moshave 55 deri në 64 vjeç dhe 76 për qind të atyre të moshës 65+ që ende u drejtohen kanaleve televizive.

Kurse konsumi i transmetimit televiziv për moshat nga 16 deri në 24 vjeç ka rënë me dy të tretat në dhjetë vitet e fundit.

Investimi i Hollywood-it te Gjenerata Z është padyshim një përpjekje për të tërhequr vëmendjen e një brezi të ri që kërkon përfaqësim.

Megjithatë, televizioni dhe kinemaja kryesore duket se po ndjekin shikueshmërinë në kurriz të autenticitetit.

Koha do të tregojë nëse krijuesit e filmave të Gjeneratës Z mund të ofrojnë një zgjidhje. /BBC/

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.