Nga Gazeta ‘Si’- Çaji dhe kafeja janë pjesë e përditshmërisë për miliona njerëz dhe të dyja njihen për përfitime të ndryshme shëndetësore. Megjithatë, kur bëhet fjalë për shëndetin e kockave, studimet e fundit sugjerojnë se çaji mund të ketë një avantazh të lehtë krahasuar me kafenë – ndërsa konsumimi i tepruar i kafesë mund të ketë efekte negative.
Një studim i realizuar nga studiues të Universitetit Flinders në Australi, i publikuar në revistën shkencore Nutrients, analizoi të dhëna nga “Study of Osteoporotic Fractures”, një studim afatgjatë që përfshin gati 10 mijë gra mbi moshën 65 vjeç.
Studiuesit krahasuan konsumin e çajit dhe kafesë me densitetin mineral të kockave, veçanërisht në zonën e ijeve dhe qafës së femurit – pjesa më e rrezikuar nga frakturat.
Rezultatet treguan se pas 10 vitesh, gratë që konsumonin rregullisht çaj kishin një densitet pak më të lartë të kockave në ije krahasuar me ato që pinin kafe. Sipas bashkautorëve të studimit, kjo mund të lidhet me përbërësit natyrorë të çajit, si katekinat, të cilat mendohet se stimulojnë qelizat që ndërtojnë kockën.
Megjithatë, ekspertët theksojnë se ky përfitim është relativisht i vogël.
Sa i përket kafesë, studimi vuri re një “pikë kthese”: konsumimi i moderuar, rreth dy deri në tre filxhanë në ditë, nuk u shoqërua me rënie të densitetit të kockave. Por pirja e pesë ose më shumë filxhanëve në ditë u lidh me densitet më të ulët mineral të kockave, veçanërisht tek personat që kishin konsum më të lartë të alkoolit gjatë jetës.
Evidenca shkencore për lidhjen mes kafeinës dhe shëndetit të kockave është e përzier, dhe disa studime të mëparshme madje e kanë lidhur konsumimin e moderuar të kafesë me rrezik më të ulët për osteoporozë.
A duhet kaluar nga kafeja te çaji?
Përgjigjja e shkurtër: jo domosdoshmërisht. Specialistët theksojnë se çaji mund të ketë një avantazh të vogël, por nuk është arsye për ndryshime drastike në zakonet e përditshme. Moderimi mbetet kyç, veçanërisht për kafenë, duke mos tejkaluar dy deri në tre filxhanë në ditë – në përputhje edhe me rekomandimet për kufirin ditor të kafeinës.
Pavarësisht nëse preferoni çaj apo kafe, faktorët më të rëndësishëm për shëndetin e kockave janë të tjerë:
Ushqyerja e pasur me kalcium dhe vitaminë D, që ndihmon në ndërtimin dhe forcimin e kockave.
Aktiviteti fizik, veçanërisht ushtrimet rezistente dhe ato që mbajnë peshë, si ecja, ngjitja e shkallëve apo ushtrimet me pesha.
Shmangia e duhanit dhe kufizimi i alkoolit, të cilët ndikojnë negativisht në densitetin e kockave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
