A duhet të shqetësohemi për virusin e ri të lakuriqëve të natës

Shkencëtarët në Institutin e Virologjisë në Wuhan të Kinës raportuan së fundmi zbulimin e një tjetër koronavirusi të lindur nga lakuriqët e natës, HKU5-CoV-2, i cili është i aftë të hyjë në qeliza duke përdorur ACE2 njerëzore, i njëjti receptor që luajti një rol kritik në përhapjen shkatërruese të Covid-19.

Megjithëse nuk ka pasur asnjë infeksion njerëzor të raportuar, lajmi rriti aksionet e prodhuesve të vaksinave, duke nënvizuar shqetësimet globale për kërcënimin e vazhdueshëm të sëmundjeve të kafshëve të afta për të shkaktuar shpërthime vdekjeprurëse.

Nga murtaja dhe lija te ‘gripi spanjoll’ dhe HIV-i, historia është e mbushur me pandemi që kanë formësuar botën tonë. Ndërsa përparimet mjekësore na ndihmojnë të luftojmë këto sëmundje, sfidat moderne, të tilla si shpyllëzimi, urbanizimi dhe ndryshimet klimatike po nxisin shfaqjen e kërcënimeve të reja infektive me një shkallë alarmante.

Studiuesit mblodhën llojin HKU5-CoV-2 nga një nëngrup i vogël i qindra lakuriqëve të natës Pipistrellus në provincat Guangdong, Fujian, Zhejiang, Anhui dhe Guangxi të Kinës.

Analiza e tyre zbuloi se ai i përket një linje të veçantë të koronavirusëve që përfshin atë që shkakton sindromën e frymëmarrjes në Lindjen e Mesme (MERS) dhe lidhet vetëm në distancë me SARS-CoV-2, lloji i koronavirusit që shkaktoi pandeminë Covid-19.

Veçanërisht, lloji HKU5-CoV-2 mund të hyjë në qelizat njerëzore duke u lidhur me receptorin ACE2, një proteinë në sipërfaqen e shumë qelizave, duke pasqyruar mekanizmin e përdorur nga SARS-CoV-2 për të infektuar qelizat, riprodhuar dhe përhapur.

Eksperimentet laboratorike sugjerojnë se HKU5-CoV-2 mund të infektojë gjithashtu një shumëllojshmëri të gjerë gjitarësh, duke nënvizuar potencialin e tij për transmetimin e llojeve të ndryshme.

Ekspertët thonë se ky lloj i veçantë ka një aftësi për t’u lidhur me të njëjtin receptor në mushkëri, hundë dhe rrugët e frymëmarrjes që lejoi SARS-CoV-2 (COVID-19) të infektojë njerëzit kështu që ekziston një shans për atë që njihet si përhapje zoonotike, ku ky virus mund të infektojë gjithashtu njerëzit dhe të shkojë nga njeriu te njeriu.

Burimet: Bloomberg, Fox News. Përshtati: Gazeta Si.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.