.png)
Nga Gazeta ‘Si’- Në vazhdën e bisedimeve për zgjedhjet e parakohshme, kryeministri i Kosovës Albin Kurti, pasi u refuzua nga një pjesë e opozitës (AAK dhe LDK) ka mbajtur një takim me udhëheqësit e partive Guxo dhe Alternativa.
Në takimin e mbajtur mbrëmjen e 14 majiit, Donika Gërvalla, ministrja e tij e jashtme kësaj here shkoi në rolin e udhëheqëses së partisë Guxo, së bashku me bashkëdrejtuesin tjetër Faton Pecin.
Nga Alternativa e ftuar ishte Mimoza Kusari-Lila. Të dyja këto parti, në zgjedhjet parlamentare të vitit 2021 garuan në kuadër të listës së Lëvizjes Vetëvendosje të udhëhequr nga Albin Kurti.
“Aty u theksua se duke qenë se legjislativi dhe qeverisja kanë arritur në vitin e katërt të mandatit, është e kuptueshme se procesi zgjedhor është çështje e muajve, por që dakordimi për hapat e mëtejeshëm duhet të jetë në përputhje me vullnetin e qytetarëve të Republikës, si dhe harmonizimin e plotë të kërkesës së partive opozitare karshi pozitës në Kuvend. Vetëm atëherë mund të trajtohen seriozisht nismat për diskutime të procesit të ri zgjedhor”, thuhet në njoftimin e lëshuar nga Zyra e Kurtit.
Mandati i Qeverisë aktuale përfundon në fillim të vitit 2025, por partitë opozitare pej kohësh po kërkojnë mbajtjen e zgjedhjeve të parakohshme, pasi argumentojnë se Kurti po keqqeveris me vendin.
Për këtë çështje, më 13 maj, Kurti bisedoi edhe me Memli Krasniqin, kryetarin e subjektit më të madh opozitar, Partisë Demokratike të Kosovës për të diskutuar për datën e mbajtjes së zgjedhjeve.
Pas takimit, Kurti tha se është i interesuar që të diskutojë me opozitën për caktimin e një date se kur do të mbaheshin zgjedhjet e reja. Sipas tij, zgjedhjet do të ishte mirë që të mbaheshin në pranverë ose në vjeshtën e këtij viti. Lumir Abdixhiku nga LDK dhe Ramush Haradinaj nga AAK e refuzuan takimin.
PDK-ja kërkon që në zgjedhje të shkohet përmes shpërndarjes së Kuvendit, e cila paraprakisht kërkon mbledhjen e 40 nënshkrimeve për mocionin, i cili pastaj duhet të votohet nga 80 ligjvënës.
LDK-ka kërkon që në zgjedhje të shkohet përmes shkarkimit të Qeverisë apo dorëheqjes së saj dhe pastaj shpërndarjen e Kuvendit. Kërkesë të ngjashme ka edhe AAK-ja.
Ndërkaq, Lëvizja Vetëvendosje e ka përjashtuar mundësinë e dorëheqjes së ekzekutivit aktual.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
