.png)
Kryeministri i Greqisë, Kyriakos Mitsotakis pritet që të zhvillojë ditën e sotme një vizitë në Turqi ku do të takohet dhe me presidentin turk Rexhep Taip Erdogan.
Sipas mediave, në fokus të bisedimeve do të jetë Manastiri i Chores, për të cilin Mitsotakis pritet të shtrojë shqetësimin në lidhje me kthimin e tij në xhami, ndërsa Erdogan ka thënë se nuk është i interesuar për konflikte.
Në këtë takim pritet që të diskutohen të gjitha çështjet e agjendës dypalëshe, ndërsa do të përcaktohet edhe orari i kontakteve të radhës në nivel të dialogut politik.
Kyriakos Mitsotakis shkon për herë të parë në mandatin e tij, por dhe në jetën e tij, në kryeqytetin turk për takimin e katërt me Erdogan këto kohët e fundit, këtë herë në “Pallatin e Bardhë”.
Një element kyç që do të dalë nga takimi i Ankarasë është udhërrëfyesi i takimeve të mëpasshme. Mitsotakis dhe Erdogan pritet të takohen në Nju Jork në shtator, në margjinat e Asamblesë së Përgjithshme të OKB-së, ndërsa do të përkojnë edhe me Samitin e NATO-s në Uashington në korrik.
Sipas mediave greke Mitsotakis do të pritet rreth orës 15:30 nga Erdogan. Kryeministri grek dhe lideri turk do të bisedojnë privatisht së bashku me katër bashkëpunëtorë të tyre. Mitsotakis do të shoqërohet nga Giorgos Gerapetritis dhe këshilltarja e tij diplomatike Anna Maria Boura , Tayip Erdogan nga Hakan Fidan dhe Akif Tsagatai Kilic .
Takimi pritet të zgjasë rreth 1.5 orë, përpara se liderët të kalojnë në diskutime të zgjeruara me të gjithë delegacionet, ndërsa do të vijojnë deklaratat dhe darka, me nisjen e Mitsotakis nga Turqia në orën 21:00.
Mosmarrëveshjet territoriale mbi detin Egje, i cili besohet se ka burime të mëdha nafte, e sollën Greqinë dhe Turqinë në prag të luftës dhe vazhdojnë të shkaktojnë tensione.
Kryeministri grek Kyriakos Mitsotakis do të vizitojë Ankaranë të hënën për t’u takuar me Presidentin Rexhep Tajip Erdogan. Analistët thonë se bisedimet ka të ngjarë të shmangintema të diskutueshme dhe të përqendrohen në fushat e bashkëpunimit.
“Të dy vendet kanë diskutuar çështje si rritja e tregtisë, ndërtimi i një rruge të re në kufirin Turqi-Greqi apo udhëtimi pa viza për qytetarët turq në ishujt lindorë të Egjeut. Mendoj se të gjitha janë të rëndësishme për të rritur besimin në mes të palëve, të shtojnë kontaktet dhe të rrisin bashkëpunimin energjetik”, thotë Berkay Mandiraci, analist nga Grupi Ndërkombëtar i Krizave.
Vizita e Kryeministrit Mitsotakis në Turqi pason vizitën e Presidentit Erdogan në dhjetor në Athinë. Të dy udhëheqësit duan t’i shfrytëzojnë këto zhvillime pozitive në disa fronte.
Konfliktet në Gazë dhe Ukrainë shtojnë arsyet për përmirësimin e lidhjeve. Analistët thonë se të dy udhëheqësit e kuptojnë se tensionet mes tyre do ta përkeqësojnë situatën në rajon.
“Të dyja palët duan të zvogëlojnë ekspozimin e tyre ndaj rreziqeve të huaja. Marrëdhëniet greko-turke kanë kaluar një periudhë shumë të vështirë tre deri në pesë vjet më parë. Por që nga tërmetet, që goditën Turqinë, të dyja palët treguan vullnet për të ulur tensionet”, thotë Ioannis Grigoriadis, profesor në Universitetin Bilkent të Ankarasë.
Greqia reagoi me shpejtësi për të ndihmuar Turqinë pas tërmeteve të vitit të kaluar.
Por nëse të dy vendet nuk zgjidhin mosmarrëveshjet territoriale në Egje, përpjekjet për pajtim do të jenë të brishta, veçanërisht pasi të dy ushtritë po riarmatosen.
Presidenti Erdogan dhe Kryeministri Mitsotakis fituan mandate të reja në zgjedhjet e vitit të kaluar dhe analistët thonë se të dy janë në pozita të mira për të bërë përpjekje për t’u afruar.
“Të dy udhëheqësit janë shumë të fortë brenda vendit dhe kjo i bën ata më pak të prirur për të dëgjuar zërat nacionalistë që ekzistojnë në të dy vendet”, thotë Profesori Grigoriadis.
Të dy udhëheqësit do të fillojnë të ndërtojnë një marrëdhënie të kujdesshme para se të merren me çështjet më të diskutueshme që i kanë ndarë prej kohësh.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
