.png)
Në mes të performancës së saj në festivalin Sonorama në qytetin verior të Spanjës Aranda de Duero, Eva Amaral ishte gati të udhëhiqte grupin e saj Amaral në këngën e saj Revolución, kur hoqi pjesën e sipërme të veshjes së saj me temina të kuqe dhe e hodhi në dysheme.
“Kjo është për Rocío, për Rigoberta, për Zahara, për Miren, për Bebe, për të gjithë ne”, tha ajo, duke renditur emrat e kolegeve artiste përpara se të zbulonte gjoksin e saj.
“Sepse askush nuk mund të heqë dinjitetin e lakuriqësisë sonë. Dinjiteti i brishtësisë sonë, i forcës sonë. Sepse jemi shumë prej nesh”.
Në një koncert që shënon karrierën 25-vjeçare të grupit spanjoll, të qenit topless ishte një mënyrë për të mbrojtur dinjitetin dhe lirinë e grave për të dalë nudo dhe “një moment shumë i rëndësishëm”, tha Amaral më vonë për El País.
Por ishte gjithashtu një shfaqje solidariteti me një numër në rritje të artistëve spanjollë që po përdorin lakuriqësinë për të mbrojtur të drejtat e grave dhe janë censuruar ose sulmuar si rezultat.
Në qershor, policia ndaloi një koncert të këngëtares Rocío Saiz gjatë javës së krenarisë në Murcia, pasi ajo hoqi pjesën e sipërme të veshjes së saj për të performuar këngën Como yo te Amo, diçka që këngëtarja thotë se e ka bërë gjatë performancave për më shumë se 10 vjet.
Policia lokale që atëherë ka kërkuar falje dhe ka hapur një hetim për incidentin, duke shtuar se një oficer policie ka vepruar “gabimisht”.
Vitin e kaluar, oda jashtëzakonisht popullore e Rigoberta Bandinit për mëmësinë, Ay Mamá, u bë një lloj himni feminist në Spanjë, falë teksteve të tilla si “Nuk e di pse gjinjtë tanë janë kaq të frikshëm” dhe “duke nxjerrë gjoksin, në stilin Delacroix”.
Këngëtarja mori duartrokitje dhe kritika për shfaqjen e gjoksit të saj në skenë ndërsa performonte këngën – dhe më vonë u akuzua për censurë kur gjoksi aktual mungonte dukshëm në videoklipin e këngës.
Amaral gjithashtu iu referua këngëtares Bebe, e cila në vitin 2011 u tall për shfaqjen e një gjoksi të saj në një koncert në Logroño dhe Zahara, një këngëtare, posteri i së cilës për një album të ri u censurua në Toledo dy vjet më parë, pasi grupe katolike e kishin përshkruar si ofendim ndaj Virgjëreshës Mari.
Politikanët feministë duartrokitën shpejt gjestin e Amaral, duke përfshirë zëvendëskryeministren Yolanda Díaz, e cila e falënderoi atë për “përfaqësimin e të gjitha grave në vend” dhe për “mbrojtjen e të drejtave që sot kërcënohen”. Ministrja e Barazisë, Irene Montero, shpërndau një foto të Amaral me fjalët “për dinjitetin e brishtësisë sonë, të forcës sonë”.
Për Nuria Varelën, e cila u përfshi në krijimin e Ministrisë së parë të Barazisë në vend në vitin 2008 dhe është autore e disa librave, duke përfshirë Feminizmin për Fillestarët, gjesti i Amaral i bëri jehonë një ndjenje “të ngopur”.
“Që nga viti 2018 ka pasur një kërkesë shumë të qartë për të drejtat e grave dhe ka pësuar një kthim të konsiderueshëm në vitet e fundit”, tha Varela. “Ka një ndjenjë që ne po kthehemi te gjërat që menduam se i kishim kapërcyer”.
Dy vjet më parë, partia e ekstremit të djathtë, Vox, udhëhoqi përpjekjet për të hequr një mural në Madrid, që festonte një grup grash nga Nina Simone deri te Frida Kahlo, për të cilin tha se përmbante një “mesazh politik”.
Që të dalësh topless është haptazi politike në Spanjë, mund të shpjegohet pjesërisht nga historia e vendit.
Varela thotë se vetëm pas tranzicionit në demokraci në vitet ’70 dhe ’80, lakuriqësia femërore u bë një akt rebelimi dhe çlirimi seksual në një sistem të rreptë katolik.
“Mesazhi i Amaral është se ne kemi punuar shumë për liritë tona dhe jemi lodhur duke i rimarrë ato çdo 10 minuta”, tha ajo. “Duket sikur trupat tanë ende nuk na përkasin neve, pavarësisht shumë luftimeve. Kështu që trupat e grave vazhdojnë të jenë një fushë beteje.”
Grupi feminist Femen, i njohur për organizimin e protestave topless, ishte një pjesë më integrale e lëvizjes feministe spanjolle se sa në vendet e tjera evropiane, argumentoi Varela. “[Ajo] jo vetëm që njihet, por edhe respektohet.”
E drejta e grave për të dalë topless në publik duket se është e kërcënuar edhe në plazh dhe pishina, ku është pranuar gjerësisht prej dekadash. Megjithëse Spanja vazhdon të jetë vendi ku numri më i madh i grave zgjedh të bëjnë banja dielli pa pjesën e sipërme të bikinive të tyre, një studim nga anketuesi francez Ifop zbuloi se praktika është në rënie, me gratë më të reja që kryesojnë trendin.
Gjysma e atyre që zgjedhin të mbulohen thanë se arsyeja kryesore ishte “frika nga agresioni seksual”.
Në fillim të kësaj jave, qeveria rajonale e Katalonjës lëshoi një deklaratë për autoritetet vendore, në të cilën tha se gratë duhet të lejohen të shkojnë topless në pishinat komunale.
Megjithëse e drejta për të dalë topless është e sanksionuar në një ligj të vitit 2020, disa pishina publike e kanë ndaluar këtë praktikë, duke çuar në disa ankesa për diskriminim.
Por në një letër nga Departamenti i Barazisë dhe Feminizmit, autoriteteve lokale u tha se ndalimi i grave për të bërë topless “përjashton një pjesë të popullsisë dhe cenon zgjedhjen e lirë të çdo personi në lidhje me trupin e tyre”.
Çdo bashki që konstatohet se ka shkelur normën mund të marrë një gjobë deri në 500 mijë euro.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
