Nga Gazeta ‘SI’ – Sipas Bankës së Shqipërisë, yield-et e rritura të letrave me vlerë gjatë pjesës së dytë të vitit, janë rritur si reflektim i rritjes së normës bazë, por edhe nga bankat që kërkojnë yield-e të larta.
Raporti i Politikës Monetare i publikuar nga BSH, thekson se kanë ndikuar edhe pritshmëritë që tregu ka për të ardhmen e politikës monetare, por ato janë rritur më shumë se norma.
“Nëse pret që do të ketë rritje inflacioni, ti sillesh sikur inflacioni do të rritet dhe inflacioni rritet”, -tha drejtori i departamentit të Politikës Monetare, Erald Themeli.
“Këto zhvillime janë reflektuar edhe tek oferta në ankande, e cila ka treguar shenja kujdesi dhe një preferencë për afate të shkurtra maturimi. Prej fillimit të normalizimit të politikës monetare, diferencat e yield-it të letrave me vlerë të qeverisë ndaj normës bazë kanë ardhur duke u zgjeruar”, -thuhet në raport.
Bonoja 12-mujore, e përdorur si standard për çmimet e titujve afatgjatë, ka rezultuar me një yield 5.26% në ankandin e fundit në muajin tetor, nga 2.84% që shënonte në muajin korrik.
Rritje të ngjashme kanë shënuar edhe yield-et e obligacioneve. Nivelet e tyre aktuale gjenden mesatarisht 1.6 p.p. mbi ato të muajit korrik, si dhe 2.9 p.p. mbi nivelet e Fillimit të vitit. Rritja është shtrirë në mënyrë uniforme tek të gjitha maturitetet. Në këtë mënyrë, kurba e yield-eve është zhvendosur në një nivel më të lartë, por pa pësuar ndryshime të qenësishme në pjerrësinë e saj, pra rritje graduale.
Në ankandin e fundit të obligacioneve 5-vjeçare, yield-i mesatar i ponderuar rezultoi 7.69% , rritur me 4.37 pikë nga ankandi i fundit.
I njëjti raport tregon se pavarësisht se norma baze e interesit është rritur, nivelet e interesit të kredisë janë ende stimuluese për rritjen e kreditimit, ndonëse bankat kanë shtrënguar kushtet për shkak të pasigurive. Kjo masë ka preku 75% të kredive të lëvruara, duke ndryshuar masën e këstit të tyre të shlyerjes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
