Muzeu i Luvrit nis kërkimet për kryeveprat e blera gjatë Luftës së Dytë Botërore

Shtëpia e ankandeve, Sotheby’s dhe Muzeu i Luvrit në Paris kanë bashkuar forcat në një projekt që synon kërkimin e objekteve të blera nga muzeu midis viteve 1933 dhe 1945.

Marrëveshja e sponsorizimit, e cila zgjat tre vjet, do të ndihmojë në financimin e kërkimeve që “mund të çojnë në kthime, duke përfshirë digjitalizimin, organizimin e seminareve, ditëve të studimit dhe publikimeve”, thuhet në njoftimin e Muzeut të Luvrit.

Zyrtarët e muzeut shtojnë: “Ky patronazh i bën jehonë angazhimit të Sotheby’s për rikthimin e veprave midis 1933 dhe 1945. Ishte shtëpia e parë ndërkombëtare e ankandeve që kishte një departament të dedikuar për kërkimin e origjinës dhe kthimin”. Departamenti i kthimit të Sotheby’s u themelua në vitin 1997.

Një ditë e shfaqjeve të filmave është planifikuar në Muzeun e Luvrit më 27 janar, Dita Ndërkombëtare e Filmit në Art, si pjesë e programit të përbashkët.

Ngjarja përfshin Tregun e Artit gjatë pushtimit, një dokumentar i vitit 2021 i bazuar në gjetjet e historianes së artit, Emmanuelle Polack, e cila u emërua nga Luvri në 2020 për të hetuar blerjet e bëra gjatë periudhës 1933-1945.

Një ditë studimi është planifikuar gjithashtu për 2 shkurt, e cila do të fokusohet në “zinxhirin e transferimit të pronësisë së veprave dhe objekteve kulturore... në dritën e pushtimit gjerman”. Tema të tjera të mbuluara përfshijnë “blerjet në ankand publik nga Departamenti Egjiptian i Antikiteteve midis 1933 dhe 1945”.

Vitin e kaluar, Luvri lançoi një bazë të dhënash në internet me 485,000 regjistrime objektesh të nxjerra nga dhjetëra baza të të dhënave të brendshme.

Më shumë se 1700 vepra që u gjetën në Gjermani pas Luftës së Dytë Botërore, por që nuk u janë kthyer kurrë pasardhësve të pronarëve të tyre të ligjshëm, renditen në kategorinë e Muzeut Kombëtar.

Punimet nuk i përkasin shtetit francez, por menaxhohen nga Luvri dhe u janë besuar muzeumeve kombëtare franceze për ruajtje. Një zëdhënëse e Luvrit thotë se “partneriteti me Sotheby's ka të bëjë me veprat që janë në koleksionet e Luvrit”.