.png)
Shqipëria ka përqindjen më të madhe të bizneseve në rajon që sigurojnë 75-100% të të ardhurave vjetore nga kontratat që kanë me qeverinë për punë dhe shërbime.
Sipas rezultateve të Anketës nga Barometri i Ballkanit, e cila u publikua nga Këshilli i Bashkëpunimit Rajonal (RCC), në Shqipëri, 17% e bizneseve të anketuara i sigurojnë të ardhurat nga tenderat publikë ndërsa në rajon ka shumë pak biznese që janë të varur tërësisht në kontratat publike.
Në Bosnjë vetëm 6% e kompanive të anketuara sigurojnë 75-100% të të ardhurave nga kontratat publike, në Kosovë vetëm 1%, në Maqedoni 2%, në Malin e Zi 5% dhe në Serbi 6%.
Sipas Këshillit të Bashkëpunimit Rajonal, në Shqipëri ndikimi i sektorit publik në të ardhurat e kompanive është më e lartë se në rajon ndonëse Shqipëria ka buxhetin publik më të ulëtin në Rajon në % të PBB-së.
Pas Kosovës, Shqipëria ka nivelin më të ulët të mbledhjes së të ardhurave në rajon, në rreth 26-27% të Prodhimit të Brendshëm Bruto (PBB), nga 35-40% e PBB-së që është mesatarja e vendeve të tjera të rajonit.
Në këtë mënyrë,qeveria është e detyruar të shpenzojnë për administratën, punë publike, subvencionet e pensioneve, pagesat e borxheve maksimumi 29-30% të PBB-së, në mënyrë që të ruajë parametrat e deficitit buxhetor.
Varësia më e lartë ndaj fondeve të shtetit, u ka dhënë bizneseve më shumë garanci për aktivitetin e tyre gjatë vitit pandemik.
I njëjti indeks tregoi se në vitin e pandemisë, rënia e besimit të kompanive shqiptare ishte më e moderuar dhe mbeti në nivelin e mesatares rajonale.
Më pesimistët ishin subjektet nga Kosova besimi i të cilëve u përgjysmua dhe ata nga Mali i Zi. Të dy këto vende shënuan dhe nivelin më të ulët të indeksit, në 44.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
