Ministria greke e Mbrojtjes thotë se ka marrë masa disiplinore ndaj dy ushtarëve që u shfaqën duke folur shqip, në një video të shpërndarë përmes rrjeteve sociale.
Deklarata është bërë nga ministri i Mbrojtjes, Nikos Panajotopulos, që u pyet ditën e martë në Parlament nga Qiriakos Velopulos, kreu i partisë së ekstremit të djathtë, “Zgjidhja greke”. Velopulos kërkoi të dinte nëse ishte kryer ndonjë hetim për videon në fjalë, ku shfaqen dy ushtarët me origjinë shqiptare teksa u japin urdhra ushtarëve të tjerë grekë në një repart ushtarak.
Ministri grek i Mbrojtjes u përgjigj duke deklaruar se organet kompetente të dikasterit që drejton kishin marrë masat e duhura disiplinore, por pa dhënë hollësi se çfarë ndëshkimesh ishin dhënë,.
“Hetimi i brendshëm administrativ për këtë ngjarje specifike ka përfunduar menjëherë në mënyrë që të hetoheshin kushtet në të cilat ndodhi regjistrimi i videos dhe postimi i saj në mediat sociale”, ka deklaruar ministri grek i Mbrojtjes.
Mediat greke hamendësojnë se ndëshkimi disiplinor ndaj dy ushtarëve me origjinë shqiptare nuk lidhet me faktin se përse ata kanë folur shqip, por me publikimin e videos në internet, që sipas tyre shkel rregulloret e brendshme të ushtrisë greke.
Video e mësipërme u publikua në mes të muajit janar dhe u shpërnda me shpejtësi me titullin “Shqiptarët urdhërojnë grekët”, duke shkaktuar reagime të forta në Greqi, deri tek oficerët e Shtabit të Përgjithshëm.
Në këto pamje shfaqen dy të rinj me bereta në kokë teksa flasin shqip rrjedhshëm para kameras. Pastaj, njëri prej tyre kthehet nga toga duke urdhëruar në greqisht: “Skuadra, gatitu! Para marsh!
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
